សម្តេចហ៊ុនសែននឹងជួបជាមួយសិស្សនិទ្ទេសAថ្ងៃ២៨កុម្ភៈ
ក្នុងពិធីសម្ពោធកំណាត់ផ្លូវជាតិលេខ៧ក្នុងខេត្តក្រចេះ នៅថ្ងៃនេះសម្តេចនាយករដ្ឋមន្ត្រី ហ៊ុន សែន បានថ្លែងថាសម្តេចនឹងជួបជាមួយសិស្សនិទ្ទេសAដែលប្រឡងជាប់មធ្យមសិក្សាទុតិយភូមិក្នុងរាជធានីភ្នំពេញ នៅថ្ងៃទី២៨ ខែកុម្ភៈដើម្បីបំផុសការសិក្សារបស់ពួកគេ។សម្តេចហ៊ុន សែន បានមានប្រសាសន៍ថា៖«ខ្ញុំកំណត់យកថ្ងៃទី២៨ ខែកុម្ភៈជាថ្ងៃដែលខ្ញុំនឹងជួបសិស្សនិទ្ទេសAនៅភ្នំពេញ។ អ្នកចង់ជួបខ្ញុំហើយខ្ញុំក៏ដូច្នេះដែរ»។សម្តេចបានបន្តថាមន្ត្រីខេត្តត្រូវទទួលបន្ទុកថ្លៃស្នាក់នៅនិងអាហារសម្រាប់សិស្សនិទ្ទេសA និងឪពុកម្តាយដែលនឹងធ្វើដំណើរមកភ្នំពេញ។ វាបានធ្វើឱ្យគាត់ភ្ញាក់ផ្អើលនៅពេលដែលសិស្សប្រហែល ១.៨០០នាក់ ទទួលបាននិទ្ទេស Aចំពេលការសិក្សាតាមអនឡាញនិងជំងឺរាតត្បាតកូវីដ-១៩។សូមជម្រាបជូនថា សិស្សដែលប្រឡងសញ្ញាបត្រមធ្យមសិក្សាទុតិយភូមិ ឬបាក់ឌុប នៅក្នុងឆ្នាំសិក្សា២០២១-២០២២ គ្រប់រាជធានី ខេត្ត ដែលទទួលបាននិទ្ទេស A មានចំនួន រហូតដល់ ១ ៧៥៣ នាក់ ក្នុងនោះ មកពីរាជធានី ខេត្ត រួមមាន បេក្ខជនមកពីរាជធានីភ្នំពេញ ចំនួន៥៦៥ នាក់, ខេត្តសៀមរាបចំនួន ១៥៣ នាក់, កណ្តាល ១២៧ នាក់, បាត់ដំបង ១២៣ នាក់, កំពង់ចាម ១១៨ នាក់, បន្ទាយមានជ័យ ៩៩ នាក់, តាកែវ ៩៩ នាក់, ព្រៃវែង ៨៧ នាក់, កំពត ៧៥ នាក់, ត្បូងឃ្មុំ ៥៤ នាក់, ក្រចេះ ៤៥ នាក់, កំពង់ធំ ៤១ នាក់, កំពង់ស្ពឺ ៣៣ នាក់, ពោធិ៍សាត់ ២៨ នាក់, ស្វាយរៀង ២៦ នាក់, កំពង់ឆ្នាំង ២២ នាក់, ព្រះសីហនុ ២០ នាក់, រតនគិរី ០៩ នាក់, ស្ទឹងត្រែង ០៦ នាក់, ប៉ៃលិន ០៦ នាក់, ឧត្តរមានជ័យ ០៥ នាក់, កោះកុង ០៤ នាក់, ព្រះវិហារ ០៤ នាក់, កែប ០៣ នាក់, និងខេត្តមណ្ឌលគិរី ០១ នាក់៕