លោកBide​nសន្យាគាំទ្រអ៊ុ​យក្រែនប្រសិ​នបើរុស្ស៊ីវាយ​ប្រហារ

ប្រធានាធិបតីអាមេរិកលោកBidenបានធានាសមភាគីអ៊ុយក្រែនលោក Zelenskyថាទីក្រុងវ៉ាស៊ីនតោននឹងគាំទ្រទីក្រុង គៀវចំពេលមានភាពតានតឹងកើនឡើងជាមួយរុស្ស៊ី។ប្រធានាធិបតីអាមេរិកលោក Joe Biden បានបញ្ជាក់ជាថ្មីពីការត្រៀមខ្លួនរបស់ទីក្រុងវ៉ាស៊ីនតោនជាមួយសម្ព័ន្ធមិត្តនិងដៃគូដើម្បី”ប្រតិកម្មយ៉ាងម៉ឺងម៉ាត់ប្រសិនបើរុស្ស៊ីវាយប្រហារយ៉ាងជ្រៅទៅក្នុងអ៊ុយក្រែន”ក្នុងអំឡុងពេលសន្ទនាតាមទូរស័ព្ទជាមួយប្រធានាធិបតីអ៊ុយក្រែន Volodymyr Zelenskyនៅថ្ងៃទី២៧ខែមករាយោងតាមសេចក្តីថ្លែងការណ៍របស់ប្រធានាធិបតីអាមេរិកនៅសេតវិមាន។ប្រធានាធិបតី​អាមេរិក​ក៏​បាន​សង្កត់​ធ្ងន់​ថាអាមេរិក​ប្តេជ្ញា​គាំទ្រ​អធិបតេយ្យភាពនិង​បូរណភាព​ទឹកដី​របស់​អ៊ុយក្រែន។ យោងតាមលោកសហរដ្ឋអាមេរិកកំពុងសិក្សាវិធានការម៉ាក្រូសេដ្ឋកិច្ចដើម្បីជួយអ៊ុយក្រែននៅចំពេលមានសម្ពាធសេដ្ឋកិច្ចដោយសារតែការកើនឡើងនៃវត្តមានយោធារបស់រុស្ស៊ីនៅជិតព្រំដែននិងតំបន់ជុំវិញ។ប្រធានាធិបតី Zelensky បានបង្ហោះនៅលើ Twitter ថាលោក និងសមភាគីអាមេរិកបានសន្ទនាគ្នាតាមទូរស័ព្ទយ៉ាងយូរ ដោយផ្តោតលើកិច្ចខិតខំប្រឹងប្រែងការទូតនាពេលថ្មីៗនេះ ដើម្បីកាត់បន្ថយភាពតានតឹងក្នុងតំបន់និង “ការបង្រួបបង្រួមសកម្មភាពរួមសម្រាប់អនាគត” ។Zelenskyបានថ្លែងអំណរគុណដល់លោក Biden សម្រាប់ជំនួយអាវុធ។មេដឹកនាំនៃប្រទេសទាំង២ក៏បានពិភាក្សាអំពីលទ្ធភាពនៃការបង្កើនការគាំទ្រផ្នែកហិរញ្ញវត្ថុពីសហរដ្ឋអាមេរិកដល់អ៊ុយក្រែនផងដែរ។សហរដ្ឋអាមេរិកនិងលោកខាងលិចបានចោទប្រកាន់កងទ័ពរុស្ស៊ីជាង១០០,០០០នាក់ថាបានប្រមូលផ្តុំនៅជិតព្រំដែនភាគខាងកើតនៃប្រទេសអ៊ុយក្រែនដែលជំរុញឱ្យរដ្ឋបាលរបស់ប្រធានាធិបតី Zelensky និងអង្គការណាតូព្រួយបារម្ភថាទីក្រុងម៉ូស្គូកំពុងរៀបចំផែនការវាយប្រហារលើប្រទេសជិតខាង។ រុស្ស៊ីបានបដិសេធម្តងហើយម្តងទៀតនូវការចោទប្រកាន់នេះដោយអះអាងថារាល់ទង្វើទាំងអស់គឺសម្រាប់តែការការពារខ្លួនប៉ុណ្ណោះហើយថាលោកខាងលិចកំពុងនិយាយបំផ្លើសដោយគ្មានមូលដ្ឋាន។ក្រសួងការបរទេសសហរដ្ឋអាមេរិកបានប្រកាសកាលពីថ្ងៃទី២៣ខែមករាថា ខ្លួនកំពុងអនុញ្ញាតឱ្យបុគ្គលិកស្ថានទូតដែលមិនសំខាន់ “ស្ម័គ្រចិត្ត” ចាកចេញពីអ៊ុយក្រែនដោយចំណាយថវិការរបស់រដ្ឋាភិបាល។ ដោយនិយាយទៅកាន់ Zelensky អំពីចំណាត់ការនេះ ដែលត្រូវបានរិះគន់យ៉ាងខ្លាំងពីទីក្រុងគៀវលោកBidenបានសង្កត់ធ្ងន់ថាបេសកកម្មការទូតរបស់សហរដ្ឋអាមេរិកនៅអ៊ុយក្រែន នៅតែដំណើរការជាធម្មតា។មេដឹកនាំអាមេរិកបានគាំទ្រការសន្ទនាកាលពីសប្តាហ៍មុនរវាងអ៊ុយក្រែននិងរុស្ស៊ី ដែលនាំឱ្យមានកិច្ចព្រមព្រៀងមួយដើម្បីរក្សាបទឈប់បាញ់រវាងកងកម្លាំងនៅក្នុងតំបន់ Donbass ។ លោក​បាន​សង្កត់​ធ្ងន់​ថាក្រុង​វ៉ាស៊ីនតោន​នឹង​មិន​ស្វែង​រក​កិច្ច​ព្រម​ព្រៀង​ការទូត​ជាមួយ​ក្រុង​ម៉ូស្គូ​ដោយ​គ្មាន​ការ​យល់ព្រម​ពី​ក្រុង​គៀវ​នោះ​ទេ៕យោងតាមAFP

ប្រធានាធិបតីអាមេរិកលោកBiden។រូបភាពReuters