សម្តេចហ៊ុន​ សែនថ្លែង​អំណរ​គុណ​​ដ​ល់​រដ្ឋាភិបាល​ក្រុ​ង​ប៉េ​កាំង​និង​ប្រជាជន​ចិនចំពោះ​ទឹក​ចិត្ត​ដ៏​ធំ​​ធេ​ងក្នុង​ការ​ផ្ដល់​ជំ​នួយ​សន្ធឹក​សន្ធាប់​ដល់​​កម្ពុជា

សម្តេចនាយក​រដ្ឋមន្ត្រី​ហ៊ុន សែននៅព្រឹកថ្ងៃ​សៅរ៍​ទី​១៨​ខែ​ធ្នូ​នេះ អញ្ជើញ​សម្ពោធ​ដាក់​ឱ្យ​ប្រើ​ប្រាស់ «វិមាន​កីឡដ្ឋាន»ដែល​ជា​សំណង់​ធំ​ជាង​គេ នៃ​ពហុ​កីឡដ្ឋាន​ជាតិ​មរតក​តេជោ ស្ថិត​ក្នុង​សង្កាត់​ព្រែក​តាសេក ខណ្ឌ​ជ្រោយ​ចង្វារាជធានី​ភ្នំពេញ។ នេះ​គឺ​ជា​សំណង់​ប្រវត្តិសាស្ត្រ​មួយ​ទៀត​សម្រាប់​កម្ពុជានិង​ជា​ប្រវត្តិ​សាស្ត្រ​សម្រាប់​ទំនាក់​ទំនង​កម្ពុជា-ចិន ​ដែល​ទទួល​បាន​ថវិកា​ជា​ជំនួយ​ឥត​សំណង​សម្រាប់​ការ​សាង​សង់​ពី​រដ្ឋាភិបាល​ចិន ក្នុង​ទំហំ​ទឹក​ប្រាក់​ប្រមាណ​១៦០​លាន​ដុល្លារ។ វិមាន​កីឡដ្ឋាន ​នេះមាន​ខ្នាត​ធំ​ដែល​អាច​ផ្ទុក​អ្នក​ទស្សនា​បាន រហូត​ដល់ ៦ម៉ឺន​នាក់ ហើយ​មាន​សមត្ថភាព​ទទួល​រៀបចំ​ព្រឹត្តិការណ៍​ប្រកួត​កីឡា​ថ្នាក់​ជាតិ និង​អន្តរជាតិ​ធំ​ៗ​កម្រិត​ពិភព​លោក។ ​ សម្តេចហ៊ុន សែន កោត​សរសើរ​និង​អរគុណ​មិត្ត​ចិន​ តែ​លោក​សង្ឃឹម​ថា «​នឹង​មិន​មាន​សម្ពាធ​»​ បន្ថែម​តាម​រយៈ​មិត្តភាព​កម្ពុជា-ចិន នេះ​ទេ។
«វិមាន​កីឡដ្ឋាន» ខ្នាត​អន្តរជាតិ​ថ្មី​នេះសង់​ដោយ​ក្រុមហ៊ុន​ឯកជន តែសម្តេចនាយក​រដ្ឋមន្ត្រី​ ហ៊ុន សែន ចាត់​ទុក​ថា «នេះ​ជា​សមិទ្ធផល​របស់​ជាតិ»។ នៅ​កៀក​ក្បែរ​នឹង​លោក វ៉ាង វិនធាន ​ឯកអគ្គរដ្ឋទូត​ចិន​ប្រចាំ​កម្ពុជា សម្តេចហ៊ុន សែន បាន​ថ្លែង​អំណរ​គុណ​ដល់​រដ្ឋាភិបាល​ក្រុង​ប៉េកាំង​ និង​ប្រជាជន​ចិន ចំពោះ​ទឹក​ចិត្ត​ដ៏​ធំ​ធេង ក្នុង​ការ​ផ្ដល់​ជំនួយ​សន្ធឹកសន្ធាប់​ដល់​កម្ពុជា។ វិមាន​កីឡដ្ឋាន​នេះ គឺ​ជា​កញ្ចប់​អំណោយ​ធំ​ជាង​គេ​របស់​ចិន​ចំពោះ​ស្រុក​ខ្មែរ។​ សម្តេច បាន​សរសើរ​មិត្ត​ចិន​របស់​ខ្លួន​ ដែល​ផ្ដល់​ឱកាស​ឲ្យ​ជាង​ខ្មែរជា​អ្នក​ជ្រើស​រើស​រចនាប័ទ្ម​ម៉ូដ​ពហុកីឡដ្ឋាន ទោះ​បី​លុយ​សាង​សង់​ ជា​របស់​ចិន​ទាំង​ស្រុង​ក្តី។យ៉ាង​ណា​ក៏​ដោយ​ចុះ សម្តេចសង្ឃឹម​ថា «នឹង​គ្មាន​សម្ពាធ​ណា​មួយ​ថែម​ទៀត ដោយ​សារ​តែ​ទំនាក់​ទំនង​ស្អិត​រមួត រវាង​កម្ពុជា-ចិន»។ ក៏​ប៉ុន្តែ ទោះ​បី​ជា​មាន​សម្ពាធ​ពី​មហា​អំណាច​ណា​ក៏​ដោយ ក៏​សម្តេចហ៊ុន សែន នៅ​តែ​ប្រកាស​ពី​គោល​ជំហរ​របស់​ខ្លួន ក្នុង​ការ​រក្សា​ការពារ​សន្តិភាព​។
ឆ្នាំ​ខាង​មុខ​​នេះ ​ក្នុង​ឋានៈ​កម្ពុជា​ជា​ប្រធាន​វិល​ជុំ​អាស៊ាន គឺ​អ្នក​​ឃ្លាំមើល​ជំហរ​ការទូត​របស់កម្ពុជា ​គេ​ដាក់​ក្តី​បារម្ភ​ស្រេច​ទៅ​ហើយ ថា​ កម្ពុជា​អាច​នឹង​ផ្អៀង​ ទៅ​ផ្តល់​ប្រយោជន៍​ឲ្យ​ ចិន ជា​ម្ចាស់​ជំនួយ​ធំ គឺ​ល្អៀង​ទៅ​ចិន​ ជុំ​វិញ​ការ​សម្រេច​ចិត្ត​ណា​មួយ ដែល​មាន​ ចិន​ ​ក្នុង​ជម្លោះ​នានា​ក្នុង​តំបន់​។
សម្តេច ហ៊ុន សែន បាន​ថ្លែង​អំណរអរ​ព្រះ​គុណ ចំពោះ សម្តេច​ នរោត្តម សីហនុ ដែល​បាន​ផ្ដើម​ទាក់ទង​ជាមួយ​ចិន ហើយ​បន្សល់​កេរ​មរតក​ចំណង​ទូត​ រវាង​ប្រទេស​ទាំង​២ដល់​អ្នក​ជាន់​ក្រោយ​។ ចំពោះ​ចិន ផ្អែក​តាម​ប្រវត្តិសាស្ត្រ​សម័យ​ទំនើប​ គឺ​បក្ស​កុម្មុយនីស្ត​ចិន​ មិន​ដែល​​បោះ​បង់​ស្រុក​ខ្មែរ ឡើយ​ទោះ​បី​ក្នុង​សម័យ​វាល​ពិឃាត​ខ្មែរ​ក្រហម​ក្តី។សម្ដេចតេជោបានផ្ដាំផ្ញើតាមរយៈអគ្គរដ្ឋទូតចិនដើម្បីថ្លែងអំណរគុណដល់រដ្ឋាភិបាល និងប្រជាជនចិន សម្រាប់ទឹកចិត្តដ៏ធំធេងក្នុងការផ្ដល់ជំនួយដល់កម្ពុជានាពេលនេះ។ទាក់ទងទៅនឹងបញ្ហាជំងឺកូវីដ-១៩ សម្ដេចតេជោបានបន្តជំរុញឲ្យបន្តចាក់វ៉ាក់សាំងដល់ការជាពលរដ្ឋកម្ពុជា ជាពិសេសមនុស្សចាស់ និងកុមារ ព្រោះជំងឺកូវីដ-១៩មិនទាន់ចប់ទេ។សម្ដេចតេជោបន្តអំពាវនាវឲ្យប្រជាពលរដ្ឋខ្មែរកុំមានការភ័យស្លន់ស្លោខ្លាំងពេកជាមួយនឹងមេរោគកូវីដ-១៩ បំប្លែងខ្លួនថ្មី អូមីក្រុង គេត្រូវតែអនុវត្តវិធានការការពារជាប់ជានិច្ច។ សម្តេចតេជោ ហ៊ុន សែន អរគុណដល់បងប្អូនប្រជាពលរដ្ឋទាំងអស់ដែលបានចូលរួមអបអរសាទរនូវសមិទ្ធផលជាតិដ៏ធំនាថ្ងៃនេះ​ និងជូនពរឲ្យជួបតែសេចក្តីសុខ សេចក្តីចម្រើនគ្រប់ៗគ្នា៕សហការី