រដ្ឋាភិ​បាល​បាន​កំ​​ណត់​យក​ថ្ងៃ​ទី​០៨​ខែ​ធ្នូជា​ថ្ងៃ​កាន់​ទុក្ខថ្នាក់​ជា​តិ​ថ្វាយ​ចំ​​ពោះ​ព្រះ​សព​អតីត​នាយក​រដ្ឋ​មន្ដ្រីទី​១

​សារាចរ​ណែនាំ​ចុះ​ហត្ថលេខា​ដោយ​សម្តេច​នាយករដ្ឋ​មន្ដ្រី ហ៊ុន សែននៅ​ថ្ងៃ​សុក្រ​ទី​០៣ខែ​ធ្នូមុន​ពេល​ដែល​ព្រះ​សព​សម្ដេច​ក្រុម​ព្រះត្រូវ​យាង​ដង្ហែ​មក​ដល់​ប្រទេស​កម្ពុជានៅ​ថ្ងៃ​អាទិត្យ​ទី​០៥​ខែ​ធ្នូ​ស្អែក​នេះ​រដ្ឋាភិបាល​បាន​កំណត់​យក​ថ្ងៃ​ទី​០៨​ខែ​ធ្នូជា​ថ្ងៃ​កាន់​ទុក្ខថ្នាក់​ជាតិ​ផ្លូវ​ការ ថ្វាយ​ចំពោះ​ព្រះ​សព សម្ដេច​ក្រុមព្រះ នរោត្តម រណឫទ្ធិ អតីត​នាយករដ្ឋ​មន្ដ្រីទី១និង​ជា​អតីត​ប្រធាន​រដ្ឋសភា​កម្ពុជា​។ ការ​សម្រេច​នេះ
នៅ​ថ្ងៃ​ទី​០៨​ខែ​ធ្នូ ឆ្នាំ​២០២១ ដើម្បី​កាន់​ទុក្ខ​ថ្វាយ​​ព្រះ​សព​សម្ដេច​ក្រុម​ព្រះ នរោត្តម រណឫទ្ធិ រដ្ឋាភិបាល​កម្ពុជា​បាន​ណែនាំ​ឲ្យ​គ្រប់​ក្រសួង ស្ថាប័ន សាលារៀន វត្ត​អារាម មន្ទីរ​ពេទ្យ​រដ្ឋ​និង​ឯកជន​ ​មន្ដ្រី​រាជការ កង​កម្លាំង​ប្រដាប់​អាវុធ​គ្រប់​ប្រភេទ និង​ប្រជាជន​ទូទាំង​ប្រទេស ត្រូវ​បង្ហូត​ទង់​ជាតិ​ត្រឹម​ពាក់​កណ្ដាល​នៃ​ដង​ទង់​ជាតិ​។ ចំណែក​គ្រប់​ស្ថានីយ៍​វិទ្យុ និង​ទូរទស្សន៍ ត្រូវ​ផ្អាក​ការ​សម្ដែង និង​ចាក់​ផ្សាយ​នូវ​ទស្សនីយភាព​ផ្សេង​ៗ ដែល​មាន​លក្ខណៈ​សប្បាយ​គគ្រឹក​គគ្រេង​។ នេះ​គឺ​ជា​ការ​សម្រេច​​របស់​រដ្ឋាភិបាល​តាម​រយៈ​សារាចរ​ណែនាំ ចុះ​ថ្ងៃទី​០៣​ខែ​ធ្នូ​។រដ្ឋាភិបាលឲ្យ​ជន​រួម​ជាតិ ចូល​រួម​អនុវត្ត​តាម​ការ​ណែនាំ​នេះ ដើម្បី​ជា​កិច្ច​ចូល​រួម​មរណទុក្ខ​ដ៏​ក្រៀម​ក្រំ​បំផុត ចំពោះ​ព្រះ​សព​សម្ដេច​ក្រុម​ព្រះ នរោត្តម រណឫទ្ធិ ដែល​ព្រះ​អង្គ​មាន​គុណ​បំណាច់​ដ៏​ធំ​ធេង​ចំពោះ ជាតិ សាសនា ព្រះ​មហាក្សត្រ​។
រដ្ឋាភិបាល​កម្ពុជា​ក៏​បង្កើត​ឲ្យ​មាន​គណៈកម្មការ​រៀបចំ​ព្រះ​ពិធី​បុណ្យ​ព្រះ​សព សម្ដេច​ក្រុម​ព្រះ ព្រះ​ប្រធាន​ក្រុម​ឧត្តម​ក្រុម​ប្រឹក្សា​ផ្ទាល់​នៃ​ព្រះ​មហាក្សត្រ​កម្ពុជា​។ បើ​តាម​គម្រោងក្រោយ​ពេល​ដែល​​យាង​ដង្ហែ​មក​ដល់​កម្ពុជា​នា​ថ្ងៃ​អាទិត្យ​ទី​៥​ខែ​ធ្នូ ព្រះ​សព​របស់​សម្ដេច​ក្រុម​ព្រះ នឹង​ត្រូវ​តម្កល់​ធ្វើ​បុណ្យ​រយៈ​ពេល​៣​ថ្ងៃ​នៅ​អតីត​ព្រះ​ដំណាក់​ចាស់​នៅ​ផ្លូវ​សម្ដេច​ប៉ានមុន​ពេល​ប្រារព្ធ​ពិធី​បូជា​ថ្វាយ​ព្រះ​ភ្លើង នៅ​ទីលាន​មុខ​វត្ត​បទុមវតី ​រាជធានី​ភ្នំពេញ​។ ស្ថិត​ក្នុង​ព្រះ​រាជ​ហឫទ័យ​សោក​ស្ដាយ​ដ៏​ជ្រាល​ជ្រៅ​ចំពោះ​ការ​យាង​ចូល​ទិវង្គត​នៃ​សម្ដេច​ក្រុម​ព្រះ នរោត្តម រណឫទ្ធិ ព្រះ​ករុណា ព្រះ​មហាក្សត្រ និង​សម្ដេច​ព្រះ​មហាក្សត្រី ព្រះ​វររាជ​មាតា​ជាតិ​ខ្មែរ ទ្រង់​សព្វ​ព្រះ​រាជហឫទ័យ ប្រោស​ព្រះ​រាជទាន​ព្រះ​រាជ​ទ្រព្យ​ផ្ទាល់​ព្រះ​អង្គ ចំនួន​១២​ម៉ឺន​ដុល្លារ ជូន​ព្រះ​បុត្រា​បុត្រី​សម្ដេច​ក្រុម​ព្រះ​ សម្រាប់​រៀបចំ​ពិធី​បុណ្យ​សព​​។ ក្នុង​នោះ ព្រះ​រាជ​ទ្រព្យ​ចំនួន​២​ម៉ឺន​ដុល្លារ ជា​ព្រះ​រាជ​ទ្រព្យ​របស់​ហ្លួង​ព្រះ​មហាក្សត្រ និង​១០​ម៉ឺន​ដុល្លារ ជា​ព្រះ​រាជទ្រព្យ​របស់​ហ្លួង​ម៉ែ។គួរជម្រាបឲ្យដឹងថាសម្ដេច​ក្រុមព្រះនរោត្តម រណឫទ្ធិ ដែល​បាន​យាង​សោយ​ទិវង្គត​នៅ​ប្រទេស​បារាំង កាល​ពី​ថ្ងៃ​អាទិត្យ ទី​២៨​វិច្ឆិកា ក្នុង​ព្រះ​ជន្មាយុ​៧៧​ព្រះ​វស្សា ដោយ​ព្រះ​រោគាពាធ៕សហការី

សម្ដេច​ក្រុមព្រះ នរោត្តម រណឫទ្ធិ។រូបភាពReuters