អាស៊ី-អឺរ៉ុប​លើកទី១៣៖លទ្ធផល​សំខាន់​៣ត្រូវបាន​អនុ​ម័តជាផ្លូវការ

កិច្ចប្រជុំកំពូលអាស៊ី-អឺរ៉ុបលើកទី១៣នៅថ្ងៃទី២៥-២៦ ខែវិច្ឆិកានេះលទ្ធផលសំខាន់ៗចំនួន៣រួមមានទី១៖ សេចក្ដីថ្លែងការណ៍ប្រធានអង្គប្រជុំកំពូលASEMលើកទី១៣។ទី២៖សេចក្ដីថ្លែងការណ៍ទីក្រុងភ្នំពេញស្ដីពីការស្ដារសង្គម-សេដ្ឋកិច្ចឡើងវិញក្រោយវិបត្តិនៃជំងឺកូវីដ-១៩និងទី៣៖ឯកសារសកម្មភាពអនាគតស្ដីការតភ្ជាប់ ASEMត្រូវបានអនុម័តជាផ្លូវការក្នុងកិច្ចប្រជំកំពូលASEMលើកទី១៣ខណៈដែលកម្ពុជាធ្វើជាម្ចាស់ផ្ទះរៀបចំកិច្ចប្រជំកំពូលនោះ។ថ្លែងក្នុងសន្និសីទសារព័ត៌មានរួមក្រោយបញ្ចប់កិច្ចប្រជំកំពូល ASEM លើកទី១៣ ដែលបានប្រព្រឹត្តទៅនៅយប់ថ្ងៃទី២៦ខែវិច្ឆិកាឆ្នាំ២០២១តាមប្រព័ន្ធវីដេអូសម្ដេចហ៊ុនសែនមានប្រសាសន៍ថា កម្ពុជាពិតជាមានមោទនភាពដែលបានធ្វើជាម្ចាស់ផ្ទះរៀបចំកិច្ចប្រជុំកំពូលដ៏មានសារសំខាន់នេះ នៅក្នុងកាលៈទេសៈដែលយើងកំពុងប្រយុទ្ធនឹងការឆ្លងរាលដាលនៃជំងឺកូវីដ-១៩បញ្ហាប្រឈមក្នុងតំបន់និងសកលជាច្រើនផ្សេងទៀត ដោយមានការចូលរួមពីថ្នាក់ដឹកនាំនៃបណ្ដាប្រទេស និងស្ថាប័នដៃគូ ASEM មកពីអាស៊ី និងអឺរ៉ុប ប្រធានក្រុមប្រឹក្សាអឺរ៉ុប ប្រធានគណៈកម្មាការអឺរ៉ុប និងអគ្គលេខាធិការអាស៊ាន។ សម្ដេចបន្តថាកិច្ចប្រជុំកំពូលASEMលើកទី១៣នេះជាសញ្ញាច្បាស់មួយថាយើងប្ដេជ្ញាចិត្តធ្វើការរួមគ្នាដើម្បីលើកកម្ពស់ដំណើរការASEM។លើសពីនេះទៀតយើងមិនបានងាកចេញពីការស្វែងរកដំណោះស្រាយជាពហុភាគី ចំពោះបញ្ហាប្រឈមជាសកលនោះឡើយ។ សម្ដេចបញ្ជាក់ថាជាការពិតកិច្ចប្រជុំកំពូល ASEM លើកទី១៣បានផ្ដល់ឱកាសដ៏ពិសេស និងទាន់ពេលសម្រាប់ថ្នាក់ដឹកនាំនៃប្រទេស និងស្ថាប័នដៃគូ ASEM បង្ហាញពីការប្ដេជ្ញាចិត្តរួមគ្នាក្នុងការលើកកម្ពស់សន្តិភាពសន្តិសុខព្រមទាំងផ្ដល់នូវដំណោះស្រាយជាក់ស្ដែង ទៅលើបញ្ហាប្រឈមតំបន់សកល នាពេលបច្ចុប្បន្ន ក៏ដូចជា ការឆ្លងរាលដាលនៃជំងឺកូវីដ-១៩ និងការស្ដារសង្គម-សេដ្ឋកិច្ចឡើងវិញ សុវត្ថិភាពនិងសន្តិសុខសាធារណៈភាពមានការងារធ្វើរបស់យុវជន ការប្រែប្រួលអាកាសធាតុ ការកែទម្រង់អង្គការពាណិជ្ជកម្មពិភពលោក អំពើភេរវកម្ម បញ្ហាសន្តិសុខតំបន់ និងសកលនិងក្នុងចំណោមបញ្ហាផ្សេងៗជាច្រើនទៀត។សម្ដេចហ៊ុនសែនថ្លែងថាឯកសារទាំង៣ដែលត្រូវបានអនុម័តជាផ្លូវការក្នុងកិច្ចប្រជំកំពូលASEM លើកទី១៣នេះពិតជាបានឆ្លុះបញ្ចាំងពីការប្ដេជ្ញាចិត្តសាមគ្គីភាព និងកិច្ចខិតខំប្រឹងប្រែងរួមគ្នាយ៉ាងមោះមុត របស់ថ្នាក់ដឹកនាំនៃប្រទេស និងស្ថាប័នដៃគូASEM ទាំងអស់ ក្នុងការចូលរួមពង្រឹងពហុភាគីនិយម ដើម្បីអនាគត និងភាពជាដៃគូអាស៊ី-អឺរ៉ុបកាន់តែប្រសើរឡើង កាន់តែរឹងមាំប្រកបដោយបរិយាប័ន្ននិងមានភាពធន់។ ជាងនេះទៀតថ្នាក់ដឹកនាំនៃបណ្ដាប្រទេស និងស្ថាប័នដៃគូ ASEM បានបន្តប្ដេជ្ញាចិត្តខិតខំប្រឹងប្រែងឆ្ពោះទៅរកការកសាងសហគមន៍មួយ ដែលមានសុខដុម មានភាពប្រកួតប្រជែង ភាពធន់ និងចីរភាពសម្រាប់ប្រជាជនអាស៊ី និងអឺរ៉ុប ក៏ដូចជា សម្រាប់អនាគតនៃកិច្ចសហប្រតិបត្តិការអាស៊ី-អឺរ៉ុបពោរពេញទៅដោយថាមវន្តដោយផ្អែកលើគោលការណ៍ស្នូលនៃASEMគឺភាពមិនផ្លូវការភាពបត់បែនបាននិងការគោរពគ្នាទៅវិញទៅមកនៅក្នុងស្មារតីកុងសង់ស៊ីស និងភាពជាដៃគូស្មើភាព។ក្នុង​​ប្រជុំកំពូលអាស៊ី-អឺរ៉ុប ប្រធានក្រុមប្រឹក្សាអឺរ៉ុប លោក សាល មីស៊ែល (Charles Michel) បានថ្លែង សរសើរកម្ពុជា ​និងបញ្ជាក់ពីភាពត្រូវការគ្នាទៅវិញទៅមក រវាងអាស៊ីនិងអឺរ៉ុប ដើម្បីចូលរួមដោះស្រាយនិងស្តារសេដ្ឋកិច្ចពាណិជ្ជកម្មក្រោយរងគ្រោះពីវិបត្តិកូវីដ១៩។ ​ការ​ចាក់​វ៉ាក់​សាំង ប្រឆាំង​នឹង​កូវីដ​ត្រូវ​ថ្នាក់ដឹកនាំ​ ASEM យល់ថា ជាមធ្យោបាយដ៏សំខាន់ ដើម្បីចាកចេញពី​វិបត្តិ។ប៉ុន្តែ​​ បើទោះបី​ជា​ប្រទេស​ជាច្រើន​ នៅ​ក្នុង​ទាំងទ្វីប២អាស៊ីអឺរ៉ុប​កំពុងតែ​ជំរុញការ​ផ្តល់​ថ្នាំបង្ការ​កូវីដក្តីតែ​ អតុល្យភាព​ភាពក្នុង​ចំណោម​ពលរដ្ឋ​ទទួល​ថ្នាំបង្ការរួច គឺ​មាន​នៅ​គម្លាតគ្នា​ឆ្ងាយ​​រវាង​ប្រទេស​ធំមាននិងនៅតាម​​ប្រទេស​ក្រីក្រ​។​នៅ​ក្នុង​​កិ​ច្ចប្រជុំចង្អៀតថ្ងៃទី​២មាន​ប្រធាបទ​​ក្តៅ​ៗ គួរ​ឲ្យ​ទាក់​ចិត្ត​​ គឺ​​ថ្នាក់​ដឹកនាំ ASEM មួយ​ចំនួន​របស់​​ ASEM លើកឡើងពី​សំណុំ​រឿង​សមុទ្រចិន​ខាងត្បូង និង​រឿង​ភូមាដែល​ចៀស​មិននិយាយ​មិនបាន​។ លោក លុយ ដាវីត រដ្ឋលេខាធិការក្រសួងការបរទេសខ្មែរ និងជា​ប្រធានលេខាធិការដ្ឋានជាតិរៀបចំកិច្ចប្រជុំកំពូលអាស៊ី-អឺរ៉ុប លើកទី១៣ ​មានប្រសាសន៍ថាសំណុំ​រឿងនុយក្លេអ៊ែរ​​កូរ៉េខាង​ជើង​ គឺថ្នាក់ដឹកនាំ​ASEM​នៅ​តែ​ជំរុញ​ចង់​ឲ្យ​ភាគី​កូរ៉េខាងជើង​ចូល​តុចរចា។​ ចំណែកវិបត្តិ​អាហ្វហ្គានីស្ថាន​, អាស៊ី-អឺរ៉ុប ​កោត​សរសើរស្មារតី​ជួយ​យកចិត្តទុកដាក់​ដល់​ជន​ភៀសខ្លួន​។​ក្នុង​អង្គប្រជុំ​ ប្រធានក្រុមប្រឹក្សាអឺរ៉ុប លោក សាល មីស៊ែល ​បានរំលឹក​ប្រាប់វេទិកា​កំពូល​នេះ ពីជំហរសហភាពអឺរ៉ុបគឺនៅតែប្រកាន់យ៉ាងមុតមាំពីការគោរពគោលការណ៍សិទ្ធិមនុស្សលទ្ធិប្រជាធិតេយ្យ និងសេរីភាព​ជាមូលដ្ឋាន​។ការ​រំលឹក​នេះពុំ​មែន​ជារឿង​ចៃដន្យ​នោះទេ ខណៈ​ដែល​ប្រជាជាតិ​ច្រើន​នៅ​តំបន់​អាស៊ី​និងអឺរ៉ុបកំពុងតែប្រឈម​រឿង​រំលោបបំពាន​សិទ្ធិ​ពលរដ្ឋពិសេស​ក្នុង​ដំណាក់​កាល​ប្រឆាំង​នឹង​ព័ត៌មាន​ក្លែងក្លាយនិង​ប្រយុទ្ធ​ប្រឆាំងការ​រាតត្បាត​មេរោគ​កូវីដ។​​ក៏ប៉ុន្តែ​លោកលុយដាវីដមន្ត្រី​ជាន់​ខ្ពស់​ខ្មែរដែល​តាមដាន​​ដិតដល់​​ក្នុង​អង្គប្រជុំបាន​បញ្ជាក់ថាប្រសាសន៍របស់ប្រធានក្រុមប្រឹក្សាអឺរ៉ុបគឺស្តីពី​គោលការណ៍សិទ្ធមនុស្សនិងសេរីភាព​​ទូទៅ​ដែល​ជា​សសរ​ស្តម្ភ​របស់​សហភាពអឺរ៉ុប​តែ​ប៉ុណ្ណោះហើយ​មិន​សំដៅ​ប្រទេស​ណាមួយ​ក្នុង​អង្គប្រជុំនទេ៕​សហការី