លោក​សមរង្ស៊ីថាការ​​រឹបអូស​អគារ​ជា​ការសង​សឹ​កខ​ណៈ​មេ​ធាវីរដ្ឋាភិ​បា​​លជា​ការអនុវត្ត​តា​មច្បាប់

វិទ្យុបារាំងបានចេញផ្សាយថាលោកសម រង្ស៊ីប្រធាន​ស្តីទី​អតីត​គណបក្ស​សង្គ្រោះជាតិកាលពី​ថ្ងៃ​ម្សិលមិញ ​បាន​ថ្លែង​ប្រាប់​វិទ្យុ​អាស៊ី​សេរី​ថាការ​រឹបអូស​អគារដែលជា​ទីស្នាក់ការ​របស់​អតីត​គណបក្ស​សង្គ្រោះជាតិ​ថា​ ជា​ការ​តាម​សងសឹក​របស់​លោក​នាយក​រដ្ឋមន្ត្រីហ៊ុន សែនមកលើ​រូបលោក​ទៅលើ​ផ្នែក​ហិរញ្ញវត្ថុ​។ ការ​លើកឡើង​របស់​លោក ​សម រង្ស៊ី ​ដូច្នេះ​ធ្វើឡើង​ក្រោយ​តុលាការ​ក្រុង​ភ្នំពេញ​ចេញ​ដីការ​រឹបអូស​ទីស្នាក់ការ​អតីត​គណបក្ស​ប្រឆាំង​ដែលជា​ទ្រព្យ​សម្បត្តិ​លោក​ សម រង្ស៊ី ​ដាក់​លក់​ឡៃឡុង ​ដើម្បី​សង​បំណុល​រាប់ពាន់​លាន​រៀលដល់​លោក​ហេង សំរិន​ លោក ​ហ៊ុន សែន ​និង​លោក ​ស ខេង ​ដែលបាន​ឈ្នះក្តី​លើ​លោក​សម រង្ស៊ី ​កន្លង​មក​។ពីក្រៅ​ប្រទេស ​លោក ​សម រង្ស៊ី ​ដែលជា​ប្រធាន​ស្តីទី​អតីត​គណបក្ស​សង្គ្រោះជាតិ ​បាន​ថ្លែង​ថា ការ​រឹបអូស​ទីស្នាក់ការ​ធំ​អតីត​គណបក្ស​សង្គ្រោះជាតិ ​តាម​ដីការ​របស់​តុលាការ​ក្រុង​ភ្នំពេញ​នៅ​សង្កាត់​ចាក់អង្រែរ ​គឺជា​ការ​តាម​ធ្វើទុក្ខ​បុកម្នេញសងសឹក​ទៅលើ​រូបលោក​ទាំង​នយោបាយ ​និង​ហិរញ្ញវត្ថុ​ពីសំណាក់​លោក​នាយករដ្ឋមន្ត្រី ​ហ៊ុន សែន​។ទីស្នាក់ការ​អតីត​គណបក្ស​សង្គ្រោះជាតិ ​តាមពិតទៅ​ជាដី​របស់​លោក ​សម រង្ស៊ី ​និង​ភរិយា ​តែ​ជួលឲ្យ​អតីត​គណបក្ស​សង្គ្រោះជាតិ​ដោយតម្លៃ​និម្មិតរូប​មួយ ​ដើម្បី​បើក​ទីស្នាក់ការ​បក្ស​ប្រឆាំង​។ក៏ប៉ុន្តែ​លោក ​សម រង្ស៊ី​ បញ្ជាក់​តាមរយៈ​ការ​សាកសួរ​ពី​វិទ្យុ​អាស៊ីសេរី​ថា ​លោក​មិនខ្វល់​ទេ ​ដោយសារ​តែ​លោក​មិនមែន​ជា​មនុស្ស​សម្ភារៈ​និយម​ ហើយ​ការ​បាត់បង់​ទ្រព្យសម្បត្តិ​បន្តិចបន្ទួច​នៅ​ប្រទេស​កម្ពុជា​ក៏ជាការល្អដែរ ។ក៏ប៉ុន្តែ​ក្រុម​មេធាវី​របស់​រដ្ឋាភិបាល ដែល​ដឹកនាំ​ដោយ​លោក គី តិច ​កាលពី​ថ្ងៃ​ម្សិលមិញ ​ក៏បាន​ចេញ​សេចក្តី​ថ្លែងការណ៍​មួយ ​បញ្ជាក់​ដែរ​ថា​លោក ​សម រង្ស៊ី ​និង​ភរិយា ​គឺ​លោកស្រី ​ជូឡុង សូមូរ៉ា ​ត្រូវបាន​តុលាការ​ចេញ​សេចក្តី​សម្រេច​ថា​មាន​ទោស ​ហើយ ​លោក ​សម រង្ស៊ី ​និង​ភរិយា ​មិនបាន​អនុវត្ត​សំណង​រដ្ឋប្បវេណី​ចំពោះ​ដើម​បណ្តឹង​ដោយ​ស្ម័គ្រចិត្ត​ឡើយ​។ ​ក្នុង​ករណី​នេះ ​ដើម​បណ្តឹង ​មាន​សិទ្ធិ​សុំ​ឲ្យ​តុលាការ​ រឹបអូស​ទ្រព្យ​សម្បត្តិ​របស់​ពិរុទ្ធជន​យកទៅ​លក់​ឡៃឡុង ​ដើម្បី​យក​ប្រាក់​មកសង​សំណង​ទៅតាម​ការ​កំណត់​នៃសាលក្រម ​ឬ​សាល​ដីកា ​ដែលបាន​ចូលជា​ស្ថាពរ ​ឬ​ដែលមាន​អានុភាព​អនុវត្ត​ដោយ​បង្ខំ​។ ​នេះបើតាម​ក្រុម​មេធាវី​រដ្ឋាភិបាល​។សូមរំលឹក​ថា ​ចៅក្រម​សាលា​ដំបូង​រាជធានី​ភ្នំពេញ​កាលពី​ថ្ងៃ​ទី​១៥ ​ខែ​វិច្ឆិកា ​បាន​សម្រេច​ដាក់លក់​ដោយបង្ខំ​នូវ​ផ្ទះ​របស់ ​លោក ​សម រង្ស៉ី ​ដែលជា​ទីស្នាក់ការ​កណ្តាល ​អតីត​គណបក្ស​សង្រ្គោះជាតិ ​ដើម្បី​អនុវត្ត​តាម​អំណាច​សាលក្រម ​សាលដីកា​ស្ថាពរ ​ដើម្បី​យកទៅ​សងសំណង​ផ្នែក​រដ្ឋប្បវេណី ​និង​ប្រាក់​ពិន័យ​តាមច្បាប់ ​របស់​ភាគី​ដើមបណ្តឹង​រដ្ឋប្បវេណី​ចំនួន​៤ ​និង​បណ្តឹង​របស់​អយ្យការ​អម​សាលា​ដំបូង​រាជធានី​ភ្នំពេញ​ចំនួន៤​សំណុំ​រឿង​ទៀត​។ ដើម​បណ្តឹង​រដ្ឋប្បវេណី ​ដែល​លោក ​សម រង្ស៊ី ​ត្រូវ​សង​ជំងឺចិត្ត​ពីបទ​បរិហារកេរ្តី៍​កាលពី​៣ ​និង​៤​ឆ្នាំ​មុន រួមមាន​លោក​នាយក​រដ្ឋមន្ត្រី ​ហ៊ុន សែន ​ចំនួន ​៤ ០០០​លាន​រៀល ​លោក ​ហេង សំរិន ​ប្រធាន​រដ្ឋសភា​ចំនួន​៤ ០០០​លាន​រៀល ​និង​លោក ​ស ខេង ​រដ្ឋមន្ត្រី​ក្រសួង​មហាផ្ទៃ​ចំនួន ​២ ០០០លាន​រៀល​។ ដោយឡែក ​ក្នុង​សំណុំរឿង​ប្តឹង​ដោយ​មេធាវី​តំណាង​រដ្ឋាភិបាល​កម្ពុជា ​តុលាការ​បាន​បង្គាប់​ឲ្យ​លោក​ សម រង្ស៉ី ​សង​ជំងឺចិត្ត​ចំនួន ​១ ៨០០​លាន​រៀល​ទៀត ​ដែល​សាលក្រម​ស្ថាពរ​សំណុំរឿង​នេះ​ ចេញដោយ​សាលា​ដំបូង​រាជធានី​ភ្នំពេញ ​កាលពី​ថ្ងៃទី​០១ ​ខែ​មីនា ​ឆ្នាំ​២០២១​៕សហការី

លោកសម រង្ស៊ីប្រធាន​ស្តីទី​អតីត​គណបក្ស​សង្គ្រោះជាតិ។រូបភាពAP