កម្ពុជាបាន​ហៅការ​ដា​ក់​​ទណ្ឌកម្មអាមេ​រិកថាជា​​ការជ្រៀត​ជ្រែក​កិ​ច្ចការ​ផ្ទៃក្នុង​

សេចក្តី​ថ្លែងការណ៍​រដ្ឋាភិបាលកម្ពុជា​តាមរយៈ​ក្រសួង​ការបរទេស​និង​ក្រសួងការពារជាតិបានចេញ​បដិសេធ​​ចំពោះការ​ប្រកាស​ដាក់​ទណ្ឌកម្ម​របស់​អាមេរិក​មកលើ​នាយឧត្តម​សេនីយ៍​កម្ពុជា២រូប។ការដាក់ទណ្ឌកម្ម​ក្រោម​ការ​ចោទ​ប្រកាន់​ពាក់ព័ន្ធ​នឹងអំពើពុករលួយ​ក្នុង​ការ​កសាង​មូលដ្ឋាន​កងទ័ពសមុទ្ររាម ។​រដ្ឋាភិបាលកម្ពុជាបាន​ហៅការ​ដាក់​ទណ្ឌកម្មជាឯកតោភាគីនេះថាជាការជ្រៀត​ជ្រែក​កិច្ចការ​ផ្ទៃក្នុង​កម្ពុជាទៅវិញទេ។នៅក្នុង​សេចក្តី​ថ្លែងការណ៍​ដោយ​ឡែក​ពី​គ្នានៅ​ថ្ងៃទី១២​វិច្ឆិកាទាំង​អ្នក​នាំពាក្យ​ក្រសួងការបរទេសកម្ពុជានិង​អ្នកនាំពាក្យ​ក្រសួង​ការពារជាតិ​កម្ពុជាបាន​បដិសេធ​យ៉ាង​ដាច់​អហង្ការ ចំពោះ​ក្រសួង​រតនាគារ​ជាតិអាមេរិកដែល​ដាក់​ទណ្ឌកម្ម​ជាឯកតោ​ភាគីមក​លើ​មន្ត្រីយោធាជាន់ខ្ពស់កម្ពុជា២រូប។​សម្រាប់អ្នក​នាំពាក្យ​ក្រសួង​ការ​បរទេស​កម្ពុជាការចោទ​ប្រកាន់​នេះ​គឺ «​ជា​ការលាប​ពណ៌ហើយ​មិនត្រឹមតែបំពានលើ​ច្បាប់អន្តរជាតិនិង​បទដ្ឋានមូលដ្ឋាន​នៃ​ទំនាក់ទំនង​អន្តរ​ជាតិ​ទេ តែ​ក៏​បាន​បង្ហាញ​ពី​ការ​មាក់​ងាយ​ទាំងស្រុង​ដល់ឯករាជ្យ​ភាពនិង​ជា​ការ​ជ្រៀត​ជ្រែក​កិច្ចការ​ផ្ទៃ​ក្នុង​របស់​ប្រទេស​ផ្សេង​ទៀត​ដែរ​»។ចំណែកអ្នកនាំពាក្យ​ក្រសួងការពារជាតិវិញ បានចាត់ទុកការ​ដាក់​ទណ្ឌកម្មនេះថា «ជាកាយវិការ​ខ្វះ​វិចារណញាណនិងមានលក្ខណៈជាការបង្ករឿង​ឥតឈប់ឈរ»។
គួររលឹកដែរថា​ក្រសួង​រតនាគារជាតិ​អាមេរិកកាលពីថ្ងៃទី ១០ ខែវិច្ឆិកា ដែល​បានសម្រេច​ដាក់ទណ្ឌកម្ម​លើមន្រ្តី​យោធាជាន់ខ្ពស់​កម្ពុជា​២រូប​បន្ថែមទៀត​ គឺលោក​ចៅ ភិរុណ​ អគ្គនាយក​នៃអគ្គនាយកដ្ឋាន​សម្ភារ​បច្ចេកទេស​នៃក្រសួង​ការពារជាតិ​ និង​លោក ទៀ វិញ​ មេបញ្ជាការ​កងទ័ពជើងទឹក​កម្ពុជា។​ ទម្ងន់នៃទណ្ឌកម្មនេះ​គឺមិន​ឲ្យ​ឧត្តម​សេនីយ៍ទាំង​២​រូបនេះ​ចូល​ទឹកដី​អាមេរិក​ និងបង្កកទ្រព្យសម្បត្តិរបស់ពួកគេ បើមានរក្សាទុកនៅអាមេរិក។ ការដាក់​ទណ្ឌកម្មនេះគឺ​អាមេរិកចោទមន្ត្រីយោធា២រូបនេះថា បានប្រើប្រាស់ឥទ្ធិពលនយោបាយប្រព្រឹត្ត​អំពើពុករលួយក្នុងការកសាង​មូលដ្ឋាន​កងទ័ពជើង​ទឹករាម​របស់កម្ពុជា។ ជាទីដែល​សហរដ្ឋអាមេរិក​ចោទថា កម្ពុជា​បាន​អនុញ្ញាតឲ្យ​យោធាចិន​ប្រើ​ប្រាស់​ទីតាំងនោះជាមូលដ្ឋានកងទ័ពនៅទីនោះ៕សហការី

រូបសហការី