លោកTrumpបាន​​ទទួ​លជ័យជម្នះផ្នែ​កច្បាប់​ដ៏​សំខា​ន់មួយ

តុលាការ​ឧទ្ធរណ៍​សហព័ន្ធ​អាមេរិក​បាន​អនុម័ត​សំណើ​របស់​អតីត​ប្រធានាធិបតីDonald Trumpដើម្បី​បញ្ឈប់​បណ្ណសារ​ជាតិ​ជា​បណ្ដោះអាសន្ន​ពី​ការ​បញ្ជូន​ឯកសារ​ទៅ​គណៈកម្មាធិការ​សភា​ស៊ើបអង្កេត​កុប្បកម្ម​នៅ​វិមាន​កាពីតូល។យោងតាមកាសែតTheGuardianបណ្ណសារជាតិរបស់សហរដ្ឋអាមេរិកគ្រោងនឹងរៀបចំកំណត់ត្រារាប់ពាន់ទំព័រនិងឯកសារផ្សេងទៀតដូចជាវីដេអូសេតវិមានទៅកាន់ក្រុមអ្នកស៊ើបអង្កេតរបស់សភា ដើម្បីជួយស៊ើបអង្កេតលើកុប្បកម្មនៅទីស្នាក់ការកណ្តាលរបស់សភាក្នុងខែមករាឆ្នាំនេះ។ទោះជាយ៉ាងណាក៏ដោយនៅរសៀលថ្ងៃទី១១ខែវិច្ឆិកាតុលាការឧទ្ធរណ៍នៅទីក្រុងវ៉ាស៊ីនតោនឌីស៊ី បានអនុម័តដោយមិនបានរំពឹងទុកលើសំណើរបស់អតីតប្រធានាធិបតីDonaldTrumpក្នុងការរារាំងទីភ្នាក់ងារជាបណ្តោះអាសន្នមិនឱ្យផ្តល់កំណត់ត្រាទាំងនោះ។ចៅក្រម​សាលា​ឧទ្ធរណ៍៣​រូប​គឺ Patricia Millett, Robert Wilkins និង Ketanji Brown Jackson ក៏​បាន​កំណត់​កាលបរិច្ឆេទ​នៅ​ថ្ងៃ​ទី៣០ខែ​វិច្ឆិកា​សម្រាប់​ទឡ្ហីករណ៍។ចៅក្រមទាំង៣រូបបានសង្កត់ធ្ងន់ថាគោលបំណងនៃដីកានេះគឺដើម្បីការពារសិទ្ធិរបស់តុលាការក្នុងការវិនិច្ឆ័យលើបណ្តឹងទាមទារសិទ្ធិប្រតិបត្តិរបស់ដើមបណ្តឹងឧទ្ធរណ៍។ចៅក្រម​មុន​នេះ​បាន​សម្រេច​ថា លោក Trump មិន​មាន​ឯកសិទ្ធិ​ក្នុង​ការ​រក្សា​ឯកសារ​សម្ងាត់​របស់​សេតវិមាន​ដែល​គណៈកម្មាធិការ​ស៊ើបអង្កេត​បាន​ស្នើ​សុំ។លោក Trumpបានចាកចេញពីតំណែងនៅថ្ងៃទី២០ខែមករាបន្ទាប់ពីអាណត្តិ៤ឆ្នាំ។ លោកត្រូវបានគេចោទប្រកាន់ពីបទញុះញង់ឱ្យមានកុប្បកម្មនៅកាពីតូលបន្ទាប់ពីអ្នកគាំទ្ររាប់រយនាក់បានសម្រុកចូលវិមានកាពីតូលកាលពីថ្ងៃទី៦ខែមករាដើម្បីផ្តួលរំលំលទ្ធផលបោះឆ្នោត។ យ៉ាងណាក៏ដោយ លោក Trump បានបដិសេធការចោទប្រកាន់នេះ៕យោងតាមGuardian

​អតីត​ប្រធានាធិបតីអាមេរិកDonald Trump។រូបភាពAFP