រដ្ឋាភិបាលកម្ពុជាឲ្យរើស​កងទ័ព៦០​០នាក់ទៀត​ដើម្បីបំពេញអង្គភាព​ដែល​បង្កើតថ្មី

រដ្ឋាភិបាល​កម្ពុជា​បានអនុញ្ញាតឲ្យក្រសួងការពារជាតិ​ជ្រើស​រើស​កងទ័ពចំនួន៦០០នាក់ទៀតដើម្បី​បំពេញ​ក្របខណ្ឌ​ឲ្យ៣​កង​វរសេនាតូចដែលបង្កើតថ្មីចំណុះបញ្ជាការដ្ឋាន​កាំភ្លើងធំនៃអគ្គបញ្ជាការ។នេះបើតាម​សេចក្តី​សម្រេច​របស់​ប្រមុខ​រដ្ឋាភិបាលនៅខែមិថុនាឆ្នាំ២០២២នេះ។ការ​ជ្រើស​រើស​កងទ័ព​បន្ថែម​នៅពេល​នេះ​នាំឲ្យការ​វិភាគថាជាការ​បង្ហាញសាច់ដុំ​មុនការបោះឆ្នោត​ថ្នាក់ជាតិមកដល់ខណៈ​ពិភពលោក​កំពុង​តែ​មានការបាត់​បង់​សណ្តាប់ធ្នាប់​ដែលកើចេញពីជម្លោះរវាងរុស្ស៊ីនិងអ៊ុយក្រែន។
លោកបណ្ឌិត មាស នី អ្នកស្រាវជ្រាវពីការអភិវឌ្ឍន៍សង្គមវិភាគថាមានកត្តា២​ដែលធ្វើ​ឲ្យ​រដ្ឋាភិបាល​កម្ពុជា​សម្រេចជ្រើសរើស​កងទ័ពបន្ថែមនៅពេលនេះខណៈដែលសេដ្ឋកិច្ចកម្ពុជាទើបងើបពីវិបត្តិកូវីដ១៩។
បើតាមអ្នកវិភាគរូបនេះការជ្រើសរើសកងទ័ពនៅពេលនេះគឺជាការបង្ហាញសាច់ដុំ​នៅមុន​ការ​បោះឆ្នោត​ថ្នាក់ជាតិ​មកដល់។ម្យ៉ាងទៀតលោកយល់ថាការជ្រើសរើសកងទ័ពបន្ថែមនេះគឺស្របពេល​ដែល​ពិភពលោក​កំពុងតែធ្វើដំណើរឈានទៅរកការបាត់​បង់​សណ្តាប់ធ្នាប់ខណៈ​ដែល​រុស្ស៊ី​បានប្រើប្រាស់​កម្លាំង​ទ័ព​របស់​ខ្លួនវាយលុកទៅលើប្រទេសអ៊ុយក្រែនដែលនៅជាប់របងគ្នា។សម្រាប់កម្ពុជា លោក មាស នី យល់ថា ការរើសកងទ័ពនេះមិនខុសទេខណៈកម្ពុជាស្ថិតនៅចន្លោះ​នៃប្រទេស២​ដែលមានកងទ័ពខ្លាំងដូចជាវៀតណាមដែលឈរលំដាប់ទី៤លើពិភពលោកនិងថៃ​​ក៏មានសម្ភារៈយោធាទំនើបសម្បើមណាស់ដែរ។ ប៉ុន្តែលោកគូសបញ្ជាក់ថាការ​ប្រើប្រាស់​កងទ័ព​ដើម្បី​ទប់​ទល់​នឹង​​ប្រទេ​សណាមួយគឺមិនមែនជាជម្រើសល្អប៉ុន្មានទេ។ជម្រើសល្អគឺការជ្រើសរើស​ផ្លូវការទូត​ដើម្បីពង្រីក​សេដ្ឋកិច្ចរបស់ខ្លួន​គឺជារឿងសំខាន់។​សូមបញ្ជាក់ថារដ្ឋាភិបាល​កម្ពុជា​បានអនុញ្ញាតឲ្យក្រសួងការពារជាតិ​ជ្រើស​រើស​កងទ័ពចំនួន៦០០នាក់ទៀតដើម្បី​បំពេញ​ក្របខណ្ឌ​ឲ្យ៣​កង​វរសេនាតូចដែលបង្កើតថ្មី ចំណុះបញ្ជាការដ្ឋាន​កាំភ្លើងធំនៃអគ្គបញ្ជាការ​។នេះបើតាម​សេចក្តី​សម្រេច​របស់​ប្រមុខ​រដ្ឋាភិបាលនៅខែមិថុនាឆ្នាំ២០២២នេះ។ដោយលើកឡើងពីសង្គ្រាមរវាងរុស្ស៊ីនិងអ៊ុយក្រែន ​លោកនាយក​រដ្ឋមន្ដ្រី​ ហ៊ុន សែន ​កាលពីខែមេសាឆ្នាំ២០២២នេះ ក៏សម្រេចរួចហើយ​ឲ្យ​ក្រសួង​ការពារជាតិ ជ្រើសរើស​ពលទាហាន​ថ្មី​ចំនួន ៤០២ នាក់ដើម្បី​រៀបចំ​កង​កាំជ្រួច ការពារ​អាកាស​រយៈកម្ពស់​មធ្យម ចំណុះ​បញ្ជាការដ្ឋានការពារអាកាស​។ជាសរុបកម្ពុជាប្រកាសរើសកងទ័ពយ៉ាងតិចជាង១ពាន់នាក់នៅឆ្នាំ២០២២នេះ៕យោងតាមRFI

កងទ័ពកម្ពុជា។រូបភាពឯកសារផេកលោកឧត្តមសេនីយ៍ឯក ហ៊ុន ម៉ា ណែត អគ្គមេបញ្ជាការរងកងយោធពលខេមរភូមិន្ទនិងជាមេបញ្ជាការកងទ័ពជើងគោក ។