សម្តេចហ៊ុន សែនថា​EBAលែង​ជា​ប​ញ្ហា​តែ​កូវីដ​១៩​​ទើប​ជា​រឿង​សម្រា​ប់​កម្ពុជា

សម្តេចហ៊ុន សែននាយករដ្ឋមន្រ្តីនៃកម្ពុជា​អំឡុង​ពេល​សំណេះ​សំណាល​ជា​មួយ​ពលរដ្ឋ​នៅ​ឯប្រទេស​ស្វីស បាន​ថ្លែង​ជា​សាធារណៈ​ថាបញ្ហា​ប្រព័ន្ធ​អនុ​គ្រោះ​ពន្ធ EBA លែង​ជា​ខ្យល់​ខ្មោច​ស្អីសម្រាប់​កម្ពុជា​តទៅ​ទៀត​ហើយ​។ក៏​ប៉ុន្តែ​សម្រាប់​សម្តេចហ៊ុន សែន បញ្ហា​កូវីដ​១៩ ​ទើប​ជា​រឿង​ដែល​ជះ​ឥទ្ធិពល​ដល់​កម្ពុជា​ដ្បិត​រដ្ឋា​ភិបាល​ត្រូវ​ចំណាយ​ថវិកា​រាប់​លាន​ដុល្លារដើម្បី​ប្រយុទ្ធ​ប្រឆាំង​។ «អារឿង EBA វា​អត់​មាន​ខ្យល់​ខ្មោច​ស្អី​ទេរឿង​កូវីដទើប​វា​បញ្ហា»។នេះគឺជាអះអាងរបស់ប្រមុខរដ្ឋាភិបាលសម្តេចហ៊ុន សែន នាអំឡុងពេលលោកជួបសំណេះសំណាលជាមួយពលរដ្ឋដែលរស់នៅក្នុងបណ្តាប្រទេសទ្វីបអឺរ៉ុប មុនពេលដែលលោកត្រូវចូលរួមវេទិកាសេដ្ឋកិច្ចពិភពលោក នៅប្រទេសស្វីស។
សម្តេចហ៊ុន សែន បញ្ជាក់ថា ការនាំចេញរបស់កម្ពុជាទៅកាន់អឺរ៉ុបមានចំនួន៣២៩៩លានដុល្លារ ខណៈការនាំចូលពីអឺរ៉ុបទៅកម្ពុជាវិញមានចំនួន៩០៦លានដុល្លារហើយបើគិតពីទំហំពាណិជ្ជកម្មមានប្រមាណរហូតដល់ជាង៤ពាន់លានដុល្លារអាមេរិក។ ដូច្នេះសម្រាប់សម្តេចនាយករដ្ឋមន្ត្រី ហ៊ុន សែន បញ្ហាប្រព័ន្ធអនុគ្រោះពន្ធ EBA លែងជាបញ្ហាទៀតហើយ។បើតាមសម្តេច ហ៊ុន សែន ប្រព័ន្ធអនុគ្រោះពន្ធ EBA គង់តែនឹងត្រូវបាត់បង់ នៅពេលណាដែលសេដ្ឋកិច្ចកម្ពុជាឈានដល់កម្រិតណាមួយ។ សម្តេចថា ទោះបីជាសហភាពអឺរ៉ុប សាកល្បងដកប្រព័ន្ធអនុគ្រោះ EBA ២០% ពីកម្ពុជា ។ក៏ប៉ុន្តែការនាំចេញនៅតែមានកំណើន។គួរកត់សម្គាល់ថា ការថ្លែងរបស់សម្តេចហ៊ុន សែន នៅទ្វីបអឺរ៉ុប ទាក់ទងទៅនឹងបញ្ហាប្រព័ន្ធអនុគ្រោះពន្ធ EBA នាពេលនេះ គឺធ្វើឡើងបន្ទាប់ពីសភាអឺរ៉ុប កាលពីដើមខែឧសភា ​បានចេញញត្តិ​ចង្អុលទុកមុន​ថាកម្ពុជានឹងប្រឈមបាត់បង់ប្រព័ន្ធអនុគ្រោះពន្ធ​ EBA សេសសល់ទាំង ​៨០%ទៀត ប្រសិនបើការបោះឆ្នោត​​ទាំងថ្នាក់ក្រោមជាតិនិងថ្នាក់ជាតិ ​នាពេលដ៏ឆាប់ខាងមុខនេះមិនបានប្រព្រឹត្តទៅ​ដោយ​យុត្តិធម៌និងតម្លាភាព។សូមរំលឹកថា ក្រោមហេតុផលនៃ​​ការ​រំលោភ​សិទ្ធិ​មនុស្ស​ធ្ងន់ធ្ងរ​ជា​ប្រព័ន្ធ​និង​ការ​ធ្លាក់​ចុះ​លទ្ធិ​ប្រជា​ធិបតេយ្យ សហភាព​អឺរ៉ុប​បាន​សម្រេច​កាត់​ផ្តាច់​ EBA​ ពីកម្ពុជា ចំនួន​២០% កាលពីឆ្នាំ​២០២០ ​ម្តងរួ​ចហើយ​។
ក៏ប៉ុន្តែ សម្រាប់សម្តេចហ៊ុន សែន បញ្ហាកូវីដ១៩ទើបជាអ្វីដែលស្មុគស្មាញសម្រាប់កម្ពុជា បាននិងកំពុងប្រយុទ្ធប្រឆាំង។ ដោយអះអាងប្រាប់ពលរដ្ឋខ្មែរនៅទ្វីបអឺរ៉ុប សម្តេចថា រដ្ឋាភិបាលត្រូវបញ្ចេញថវិកា ប្រមាណ ៤០លានដុល្លារក្នុងមួយខែ ដើម្បីជួយពលរដ្ឋ។ លើសពីនេះ បញ្ហាកូវីដ១៩ បានចាយថវិកាសន្សំរបស់រដ្ឋអស់ជាង ២ពាន់លានដុល្លារអាមេរិក៕RFI