ប្រមុខរដ្ឋាភិបាលកម្ពុជាសម្តេចហ៊ុនសែននៅព្រឹក​ថ្ងៃទី២០មេសានេះ​បាន​បញ្ជាក់ថា​សម្តេចនឹង​មិនចូល​រួមធ្វើ​យុទ្ធនាការ​ឃោសនាបោះឆ្នោត​ជ្រើសរើស​ក្រុមប្រឹក្សា​ឃុំសង្កាត់​អាណត្តិទី៥​ឆ្នាំ​២០២២​នេះទេ។ ​មិនបាន​ចូលរួម​ដោយសារ​សម្តេច​ហ៊ុន សែន​ត្រូវទៅបំពេញ​ទស្សនកិច្ច​ផ្ទួនៗគ្នា​នៅឯក្រៅ​ប្រទេស​នាអំឡុង​ខែឧសភា​ខាងមុខនេះ។​បើតាម​សម្តេចហ៊ុន សែនសម្តេចចង់​ទុកឱកាស​នេះ​ទៅឱ្យ​បេក្ខជន​ឬមេឃុំ​ឈរឈ្មោះទាំង​អស់​ធ្វើការ​​ឃោសនា​ស្វែងរក​សន្លឹក​ឆ្នោតដោយ​ខ្លួនឯងផ្ទាល់។​ថ្លែងក្នុងពិធីសម្ពោធ​ដាក់ឱ្យប្រើប្រាស់នូវគម្រោងការពារទឹកជំនន់និងកែលម្អប្រព័ន្ធប្រឡាយ-លូក្នុងរាជធានីភ្នំពេញជំហានទី៤ សម្តេចហ៊ុនសែនបានឱ្យដឹងថាយុទ្ធនាការឃោសនាស្វែងរកសម្លេងឆ្នោតដើម្បីជ្រើសតាំងក្រុមប្រឹក្សាឃុំសង្កាត់នាពេលមុខសម្តេចមិនចូលរួមធ្វើនោះទេក៏ព្រោះថាសម្តេចត្រូវទៅបំពេញទស្សនកិច្ចនិងចូលរួមកិច្ចប្រជុំកំពូលផ្ទួនៗគ្នានៅឯក្រៅប្រទេសនាខែឧសភាខាងមុខ។កិច្ចប្រជុំសំខាន់ៗដែលធ្វើឱ្យប្រមុខដឹកនាំកម្ពុជារូបនេះមិនអាចចេញមកឃោសនាបានរួមមាន៖ កិច្ចប្រជុំកំពូលអាស៊ាន-អាមេរិកដែលត្រូវបានឡើងនៅថ្ងៃទី១២-១៣ខែមេសាក្នុងរដ្ឋធានីវ៉ាស៊ីនតោន សហរដ្ឋអាមេរិកកិច្ចប្រជុំវេទិកាសេដ្ឋកិច្ចពិភពលោក (World Economic Forum)នៅទីក្រុងដាវូស ប្រទេសស្វីសនាថ្ងៃទី២១និងកិច្ចប្រជុំស្តីពីអនាគតអាស៊ីនៅទីក្រុងតូក្យូដែលនឹងត្រូវធ្វើឡើងតាមប្រព័ន្ធអនឡាញ។បើតាមសម្តេចហ៊ុនសែនហេតុផលសំខាន់មួយផ្សេងទៀតដែលលោកមិនអាចចូលរួមឃោសនាបោះឆ្នោតសម្រាប់ជ្រើសរើសក្រុមប្រឹក្សាឃុំសង្កាត់អាណត្តិទី៥ឆ្នាំ២០២២នេះដោយសារលោកចង់ផ្តល់ឱកាសឱ្យបេជ្ខជនឈរឈ្មោះបោះឆ្នោតមកពីគណបក្សនានាមានសមត្ថភាពនិងលទ្ធភាពគ្រប់គ្រាន់ក្នុងការប្រកួតប្រជែងគ្នាប្រកបដោយតម្លាភាពនិងសេរីភាព។សម្តេចហ៊ុនសែនក៏អំពាវនាវឱ្យអាជ្ញាមូលដ្ឋានទាំងអស់បង្កលក្ខណៈសម្បត្តិងាយស្រួលដល់ដំណើការឃោសនាបោះឆ្នោតជ្រើសរើសក្រុមប្រឹក្សាឃុំសង្កាត់នាខែឧសភាខាងមុខពិសេសផ្តល់សិទ្ធិពេញលេញដល់ប្រជាពលរដ្ឋក្នុងការសម្រេចចិត្តជ្រើសរើសគណបក្សដែលពួកគេពេញចិត្ត ព្រមទាំងមិនមានការគំរាមកំហែង ឬបង្ខិតបង្ខំអ្វីឡើយ។បន្ថែមពីនេះសម្តេចហ៊ុន សែន ក៏បានស្នើឱ្យគណបក្សនយោបាយទាំងអស់មិនគួរបង្កើតហិង្សាណាមួយក្នុងអំឡុងយុទ្ធនាកាឃោសនា និងការបោះឆ្នោតនាពេលខាងមុខនោះទេ។ សម្តេចតេជោលើកឡើងថា​ប្រជាពលរដ្ឋដឹង​ហើយអ្វីដឹងដែលត្រូវធ្វើនិងអ្វីមិនត្រូវធ្វើពីព្រោះនៅពេលគណបក្សប្រជាជនកម្ពុជា​គ្រប់គ្រង​អំណាចបងប្អូនប្រជាពលរដ្ឋ យល់ឃើញយ៉ាងម៉េច រស់នៅយ៉ាងម៉េចនិងនិយាយតាមមួយ​បែបថ្មីបើសិនគណបក្សប្រជាជនឈ្នះដឹកនាំប្រទេស អ្នកណា គណបក្សណាក៏រស់នៅ​បាន​ដែរ។ សម្តេចតេជោបានបន្តថា ការបោះឆ្នោតជ្រើសរើសក្រុមប្រឹក្សាឃុំ សង្កាត់នៅពេល ខាង​មុខនេះមានគណបក្សនយោបាយចូលរួមប្រកួតប្រជែងចំនួន១៧។ប៉ុន្តែក៏មានគណបក្សនយោ​បាយមួយចំនួនមិនបានចូលរួមប្រកួតប្រជែងបោះឆ្នោតឃុំតែគាត់ត្រៀមចូលរួមបោះឆ្នោត​ជ្រើសរើសតំណាងរាស្ត្រវិញ។សម្តេចតេជោបានមានប្រសាសន៍ថា “អីចឹងខ្ញុំមិនធ្វើការឃោសនានោះទេ ប៉ុន្តែ​សូម​កុំឱ្យមានហិង្សាឱ្យសោះ នៅក្នុងដំណើរការបោះឆ្នោតនៅកម្ពុជា មិនថាហិង្សាទៅវ៉ៃតប់គ្នា ឬហិង្សាពាក្យសំដីនោះទេ”។សម្តេចតេជោបានអះអាងថា​បរិយាកាសនយោបាយអព្យា​ក្រឹត្យ​ពិតជាចាំបាច់ធ្វើសកម្មភាពនូវការឃោសនាបោះឆ្នោត ដែលអាជ្ញាធរគ្រប់លំដាប់ថ្នាក់​ត្រូវ​បង្កលក្ខខណៈសម្បត្តិដល់គណបក្សនយោបាយទាំងអស់ឱ្យមានគ្រប់ៗគ្នា។ ទន្ទឹមនេះ សម្ដេច​តេ​ជោ​បានលើកជាឧទាហរណ៍ថា បើគណបក្សប្រជាជនធ្វើការជួបជុំនៅកន្លែងណាមួយ គណ​បក្ស​ផ្សេងក៏មានសិទ្ធិធ្វើការជួបគ្នានៅកន្លែងនោះដែរពោលគឺទាំងគណបក្សកាន់អំណាចនិងគណបក្សមិនកាន់អំណាចអាចធ្វើបានដូចគ្នា។សម្តេចតេជោបន្ដថាការធ្វើបែបនេះគឺបរិយា​កាស​នយោបាយស្ងប់ស្ងាត់នៅក្នុងពេលបោះឆ្នោត​ហើយជាការប្រកួតប្រជែង​មួយ​សម្រាប់​ការ​គ្រប់គ្រងបន្តនៅមូលដ្ឋាន។ជាមួយគ្នានោះដែរសម្តេចតេជោក៏បានបន្ថែមថា​សម្រាប់ថ្ងៃយុទ្ធនាការឃោសនា​បោះ​ឆ្នោតជ្រើសរើសក្រុមប្រឹក្សាឃុំសង្កាត់ គឺនៅថ្ងៃទី២១ ខែឧសភា ដែលសម្តេច​នឹងចេញ​ដំណើរទៅក្រៅប្រទេស ហើយថ្ងៃទី២៦ ខែឧសភា ឆ្នាំ២០២២ សម្តេចនឹងត្រឡប់មកវិញ។
សូមជម្រាបថាដំណើរការឃោសនាបោះឆ្នោតជ្រើសរើសក្រុមប្រឹក្សាឃុំសង្កាត់អាណត្តិទី៥ឆ្នាំ២០២២ នឹងប្រព្រឹត្តិនៅថ្ងៃទី២១ឧសភាឆ្នាំ២០២២និងដំណើរការបោះឆ្នោតក្រុមប្រឹក្សាឃុំសង្កាត់នឹងប្រព្រឹត្តទៅនឹងថ្ងៃទី០៥មិថុនាឆ្នាំ២០២២ ។បើតាមទិន្ន័យពីគណកម្មាធិការជាតិរៀបចំការបោះឆ្នោតហៅកាត់ថាគជប គណបក្សចំនួន១៧ខណៈគណបក្សប្រជាជនកម្ពុជានិងគណបក្សភ្លើងទៀនបានចុះបញ្ជីបេក្ខជនឈរឈ្មោះបោះឆ្នោតស្ទើតែគ្រប់ចំនួន១៦៥២ឃុំសង្កាត់៕RFI,AKP