គ.ជ.បនៅតែបន្ត​រក្សាជំ​ហរ​លុបខ​ណៈដែល​​គណបក្ស​ភ្លើង​ទៀន​​នឹង​​តស៊ូម​តិតវ៉ា

បន្ទាប់ពី​គណបក្ស​ភ្លើងទៀន​បាន​ដាក់​លិខិត​ស្នើសុំជួប​ពិភាក្សា​ជាមួយ​គ.ជ.ប ​កាលពី​ពេលថ្មីៗនេះ។​គណៈកម្មាធិការ​ជាតិរៀបចំ​ការបោះឆ្នោត​បានជួប​ជជែក​ជាមួយ​គណបក្សភ្លើងទៀន​នៅព្រឹកថ្ងៃចន្ទ​នេះដើម្បីតតាំង​ពីការលុប​បញ្ជីឈ្មោះ​បេក្ខជន​របស់​គណបក្ស​ភ្លើងទៀន​ចំនួន​១១ឃុំ-សង្កាត់។​ជាលទ្ធផល​ខាងតំណាង​ គ.ជ.ប ​នៅតែបន្ត​រក្សាជំហរ​លុបបញ្ជី​ឈ្មោះបេក្ខជន​ទាំង១១ឃុំ-សង្កាត់ ខណៈដែល​គណបក្ស​ភ្លើងទៀន​អះអាងថា​នឹង​បន្តតស៊ូម​តិតវ៉ា។​ចំណុចដែលបន្តប្រទាំងប្រទិសនិងលើកមកជជែកពេលនេះគឺការលុបបញ្ជីឈ្មោះបេក្ខជនរបស់គណបក្សភ្លើងទៀនចំនួន១១ឃុំ-សង្កាត់។លោកសុនឆ័យអនុប្រធានគណបក្សភ្លើងទៀនចាត់ទុកសកម្មភាពនេះថាជាទង្វើអយុត្តិធម៌។ អយុត្តិធម៌ត្រង់ថាមានបេក្ខជនដែលមិនគ្រប់លក្ខ័ន្តិកៈតែ២ឬប៣នាក់ បែរជាលុបបញ្ជីឈ្មោះទាំងស្រុង ដែលមានបេក្ខជនជាង១៥នាក់។ នេះបើតាមការអះអាងរបស់ លោក សុន ឆ័យ ថ្លែងប្រាប់អ្នកសារព័ត៌មាន នៅក្រោយជំនួបជាមួយ គ.ជ.ប នៅថ្ងៃនេះ។បើតាមអនុប្រធានគណបក្សភ្លើងទៀនរូបនេះ គ.ជ.ប គួរតែអនុញ្ញាតឲ្យបក្សភ្លើងទៀនបានរៀបចំបញ្ជីបេក្ខជនថ្មីសម្រាប់ឈរឈ្មោះនៅឃុំ-សង្កាត់ ដែលមានបញ្ហានោះ។ ហើយប្រសិនបើបញ្ហានេះនៅតាមមិនមានដំណោះស្រាយ លោក សុន ឆ័យ ថានឹងបន្តជួបជជែកតតាំងជាមួយ គ.ជ.ប ជាបន្តទៀត។ការសម្រេចលុបបញ្ជីបេក្ខជនឈរឈ្មោះគណបក្សភ្លើងទៀន ចំនួន១១ឃុំ-សង្កាត់ ដោយមានរាជធានីភ្នំពេញចំនួន៨កំពង់ចាមចំនួន២និងពោធិ៍សាត់ចំនួន១ត្រូវបានគណៈកម្មាធិការជាតិរៀបចំការបោះឆ្នោត លើកឡើងថា ខុសពីលក្ខន្តិកៈដែលចែងក្នុងច្បាប់ស្តីពីការបោះឆ្នោត។ ភាគីគ.ជ.ប បានបញ្ជាក់ថា បេក្ខជនទាំងនោះ ភាគច្រើនត្រូវបានគេ​បំពេញ​ប្រវត្តិរូប​ជំនួស ខណៈដែលបេក្ខជនខ្លះទៀតអះអាងថា គណបក្សភ្លើងទៀនបានដាក់បញ្ជីឈ្មោះរបស់ខ្លួន ដោយមិនប្រាប់សាមីខ្លួន។យ៉ាងណាមិញ អនុប្រធានគណបក្សភ្លើងទៀន លោក សុន ឆ័យ បានលើកឡើងដែរថា ជំនួបជាមួយគ.ជ.ប ទទួលបានលទ្ធផលផ្លែការមួយចំនួន ដោយតំណាងគ.ជ.ប បានស្តាប់ពីបញ្ហាដែលគណបក្សភ្លើងទៀនបានជួបប្រទះ ហើយក៏ទទួលយកសំណើរមួយចំនួនទៅពិចារណាគិតគូរបន្តទៀតដែរ។ ក្នុងជំនួបអស់ពេលជាងមួយព្រឹកជាមួយ គ​.ជ.ប គណបក្សភ្លើងទៀនបញ្ជាក់ពីការជជែកលើការលុបបញ្ជីឈ្មោះបេក្ខជនរបស់គណបក្សភ្លើងទៀន បញ្ហាបំភិតបំភ័យបេក្ខជនបញ្ហារាប់សន្លឹកឆ្នោតនៅតាមការិយាល័យ និងបញ្ហាមួយចំនួននៅតាមឃុំ-សង្កាត់។ នេះបើតាមការអះអាងរបស់ លោក សុន ឆ័យ អនុប្រធានគណបក្សភ្លើងទៀន។ដោយឡែកគណបក្សប្រជាជន​កម្ពុជា​ (C​P​P​) ​ដែល​កំពុង​កាន់អំណាច​បាន​បង្ហាញ​ការ​ជឿជាក់​ថា​ឧបាយកល៍ដែល​គណបក្សប្រឆាំង​នឹង​ប្រើប្រាស់​ដើម្បី​បំផ្លាញ​ដំណើរ​ការបោះឆ្នោត​ជ្រើសរើស​ក្រុមប្រឹក្សា​ឃុំ​សង្កាត់​នឹង​ត្រូវ​បរាជ័យ​ ដោយ​ថា​ប្រជាជន​កម្ពុជា​ដឹង​ច្បាស់​ពី​មហិច្ឆតា​របស់​ពួកគេ​។​​ទោះ​យ៉ាងណា​ ​មេដឹកនាំ​បក្ស​ប្រឆាំង​មួយ​ចំនួន​កាល​ពី​សប្តាហ៍​មុន​បាន​ពណ៌នា​ការ​អះអាង​របស់​ C​P​P​ ​ថា​ ​គ្មាន​មូលដ្ឋាន​ និង​ជា​«​វោ​ហា​សាស្ត្រ​នយោបាយ​»​ក្នុង​គោលបំណង​លាប​ពណ៌​គណបក្សប្រឆាំង​។

លោក​ ​សុខ​ ​ឥ​សាន​ ​អ្នកនាំពាក្យ​គណបក្សប្រជាជន​កម្ពុជា។រូបភាពKhmerTime

​​ក្នុង​បទសម្ភាសន៍​ជាមួយ​ខ្មែរ​ថា​ម​ស៍ ​លោក​ ​សុខ​ ​ឥ​សាន​ ​អ្នកនាំពាក្យ​គណបក្សប្រជាជន​កម្ពុជា​បាន​ចោទប្រកាន់​គណបក្សប្រឆាំង​ថា​បាន​បង្កើត​បរិយាកាស​មិន​ល្អ​មុន​ការបោះឆ្នោត​ និង​ទម្លាក់កំហុស​មក​លើ​គណបក្ស​កាន់អំណាច​។​
គណបក្សប្រឆាំង​បាន​ចោទប្រកាន់​មន្ត្រី​ ​និង​អាជ្ញាធរ​មូលដ្ឋាន​របស់​ C​P​P​ ​ថា​បាន​ដាក់​សម្ពាធ​លើ​បេក្ខជន​សមាជិក​ក្រុមប្រឹក្សា​របស់​ខ្លួន​ឲ្យ​ដកខ្លួន​ចេញពី​ការ​ប្រជែង​ ​ហើយ​បន្ត​ការ​ចាប់ខ្លួន​សកម្មជន​នៅ​តាម​មូលដ្ឋាន​របស់​ខ្លួន​ ​ខណៈ​គណៈកម្មាធិការ​ជាតិ​រៀបចំ​ការបោះឆ្នោត​ ​បាន​ដក​បេក្ខភាព​បក្ស​ប្រឆាំង​ជាង​១​០​០​នាក់​ពី​បញ្ជី​ ​ធ្វើឲ្យ​គណបក្សប្រជាជន​កម្ពុជា​អាច​ចូលរួម​ការបោះឆ្នោត​ក្នុង​ឃុំ​សង្កាត់​មួយ​ចំនួន​ដោយ​មិន​មាន​គូ​ប្រជែង​។​
លោក​និយាយ​ថា​៖​ ​«​ប្រជាជន​នឹង​មិន​បោះឆ្នោត​ឲ្យ​​គាត់​ទេ​ ​ពួកគេ​គ្មាន​គុណសម្បត្តិ​ ​ហើយ​ថែមទាំង​អុកឡុក​សភាពការណ៍​ ដូចជា​ការចោទប្រកាន់​មក​គណបក្ស​កាន់អំណាច​ថា​បាន​យាយី​ដៃគូ​ប្រកួតប្រជែង​​ធ្វើឲ្យ​បរិយាកាស​នយោបាយ​ឆ្ពោះទៅ​រក​ការបោះឆ្នោត​អាប់អ៊ួរ​​។​ ​ល្បិច​កល៍​ទាំងអស់​ប្រជាជន​បាន​ដឹង​អស់ហើយ​»​។​
C​P​P​ ​បាន​ចោទ​គណបក្សប្រឆាំង​ថា​ត្រៀមលក្ខណៈ​ដើម្បី​ឡាំប៉ា​លើ​លទ្ធផល​បោះឆ្នោត​ ​ប្រសិនបើ​ពួកគេ​ចាញ់​ការបោះឆ្នោត​បន្ទាប់ពី​ការ​លើកឡើង​ពី​បរិយាកាស​នយោបាយ​មិន​ល្អ​មុន​ការបោះឆ្នោត​។​
​លោក​ ​ឥ​សាន​ ​និយាយ​ថា​៖​ ​«​ប្រជាជន​ដឹង​ពី​ក្រ​យ៉ៅ​របស់​ពួកគាត់​អស់ហើយ​​ដូច្នេះ​ផែនការ​របស់​ពួកគាត់​នឹង​មិន​ជោគជ័យ​ទេ​»​។​លោក​ ​ស​ ​ខេង​ ​រដ្ឋមន្ត្រី​ក្រសួងមហាផ្ទៃ​ ​បាន​ជូនដំណឹង​ដល់​អាជ្ញាធរ​ទូទាំង​ប្រទេស​ ​ដើម្បី​ធានា​ថា​ ​គណបក្ស​នយោបាយ​ដែល​បាន​ចុះបញ្ជី​ទាំងអស់​មិន​ត្រូវ​បាន​រារាំង​ក្នុង​សកម្មភាព​របស់​ខ្លួន​ដែល​ឈាន​ទៅដល់​ការបោះឆ្នោត​ដែល​បាន​គ្រោង​ធ្វើ​នៅ​ឆ្នាំនេះ​ ​និង​ឆ្នាំក្រោយ​ផង​ដែរ​។​​លោក​នាយករដ្ឋមន្ត្រី​ ​ហ៊ុន​ ​សែន​ ​ក្នុង​សុន្ទរកថា​ជា​សាធារណៈ​កាលពី​ពេលថ្មីៗនេះ​ ​ក៏បាន​អំពាវនាវ​ដល់​អាជ្ញាធរ​រាជធានី​-​ខេត្ត​ទាំងអស់​ ​ផ្តល់​បរិយាកាស​អំណោយផល​ ​សម្រាប់​គ្រប់​ភាគី​គណបក្ស​ក្នុង​ការ​ជួប​សមាជិក​ ​និង​លើក​បដា​ដូច​គណបក្ស​កាន់អំណាច​ដែរ​។​
ជាថ្មី​ម្តងទៀត​លោក​ ​ឥ​សាន​ ​បាន​គាំទ្រ​ការ​សម្រេច​របស់​ ​គ​.​ជ​.​ប​ ​ក្នុង​ការ​បដិសេធ​ ​និង​ដក​បេក្ខភាព​ក្រុមប្រឹក្សា​ជាង​ ​១​០​០​ ​នាក់​មកពី​បី​គណបក្សប្រឆាំង​។​គ​.​ជ​.​ប​ ​បានការ​ពារ​សេចក្តី​សម្រេច​របស់​ខ្លួន​ក្នុង​ការ​បដិសេធ​ ​និង​ដក​ឈ្មោះ​បេក្ខជន​ចេញពី​គណបក្សប្រឆាំង​ចំនួន​បី​ ​ដែល​បាន​ចុះឈ្មោះ​ចូលរួម​ប្រកួតប្រជែង​ក្នុង​ការបោះឆ្នោត​ថ្នាក់ក្រោម​ជាតិ​ ​ដោយ​ថា​ចំណាត់​ការ​នេះ​គឺ​ត្រឹមត្រូវ​ ​យុត្តិធម៌​ ​និង​អព្យាក្រឹត​។​លោក​ ​ឥ​សាន​ ​លើកឡើង​ថា​៖​ ​«​ការ​ដក​បេក្ខភាព​ក្រុម​ប្រឹក្សា​របស់​ពួកគាត់​គឺ​ធ្វើឡើង​ស្រប​ទៅ​តាមច្បាប់​ ​ដោយ​មិន​មានការ​គៀ​ប​សង្កត់​ ​ឬ​រំលោភបំពាន​ ​ឬ​រឹតត្បិត​គណបក្ស​គូប្រជែង​នោះ​ទេ​។​ ​ក៏ប៉ុន្តែ​ពួកគេ​ខិលខូច​ ​ហើយ​ធ្វើ​ស​ម្ម​ភាព​បន្លំ​ ​ហើយ​នៅពេលដែល​គេ​រក​ឃើញ​ការពិត​ ​គេ​ចាត់វិធានការ​តាម​ផ្លូវច្បាប់​ហើយ​»​។​​លោក​ ​ថា​ច់ ​សេដ្ឋា​ ​អនុប្រធាន​ ​និង​ជា​អ្នកនាំពាក្យ​គណបក្ស​ភ្លើង​ទៀន​ ​បាន​និយាយ​ថា​ ​លោក​ចាត់​ទុក​ការ​លើកឡើង​របស់​អ្នកនាំពាក្យ​គណបក្សប្រជាជន​កម្ពុជា​ថា​ជា​«​វោ​ហា​សាស្ត្រ​យោ​បាយ​»​។​លោក​បន្ត​ថា​៖​ ​«​ខ្ញុំ​មិន​ចង់​ឆ្លើយ​នឹង​វោ​ហា​សាស្ត្រ​នយោបាយ​អវិជ្ជមាន​បែប​នេះ​ទេ​ ​ពីព្រោះ​គណបក្ស​កាន់អំណាច​កន្លងមក​ ​គ្រាន់តែ​គេ​ធ្វើសកម្មភាព​ត្រឹមត្រូវ​ក៏​ចោទប្រកាន់​គេ​យ៉ាងនេះ​ ​យ៉ាង​នោះ​ ​ចាប់​គេ​ដាក់គុក​ចោទ​គេ​ថា​ក្បត់​»​។​
​លោក​បន្ថែម​ថា​៖​ ​«​រឿង​ពិត​នៅតែ​ពិត​ ​វា​មិន​អាច​បិទបាំង​បានទេ​។​ ​អ្វី​ដែល​គាត់​លើកឡើង​គឺជា​រឿង​របស់​គាត់​ ​អ្វី​ដែល​ជា​ការពិត​យើង​នឹង​រក​ដំណោះស្រាយ​ជាមួយ​ក្រសួងមហាផ្ទៃ​។​»​លោក​និយាយ​ថា​គណបក្ស​កាន់អំណាច​គួរ​ចៀសវាង​ការចោទប្រកាន់​ដោយ​គ្មាន​មូលដ្ឋាន​លើ​គណបក្សប្រឆាំង​។​លោក​ថា​៖​ ​«​បើ​គាត់​ជា​គណបក្ស​ស្នេហាជាតិ​ ​គិត​ពី​រឿង​ជាតិ​ដែរ​ ​គាត់​មិនគួរ​ប្រើ​ភាសា​បែប​នេះ​ទេ​ ​ត្រូវ​ជជែក​គ្នា​រក​ដំណោះស្រាយ​»​។​​តាម​លោក​ ​សេដ្ឋា​ ​រហូត​មកដល់ពេលនេះ​ ​សកម្មជន​គណបក្ស​ភ្លើង​ទៀន​ចំនួន​ ៤​នាក់​ត្រូវ​បាន​អាជ្ញាធរ​មូលដ្ឋាន​ចាប់ខ្លួន​។​លោក​ ​ឥ​សាន​ ​បាន​និយាយ​ថា​គណបក្សប្រឆាំង​គួរតែ​ដោះស្រាយ​កង្វល់​របស់​ពួកគេ​ជាមួយ​ ​គ​.​ជ​.​ប​ ​ដើម្បី​ស្វែងរក​ដំណោះស្រាយ​ជាជាង​ការ​ត្អូញត្អែរ​។​​លោក​បន្ត​ថា​៖​«​ពួកគេ​ពឹងពាក់​ប្រព័ន្ធ​ផ្សព្វផ្សាយ​នៅ​ក្រៅ​ប្រទេស​ដើម្បី​ជួយ​ស្រែក​។​ ​វា​ជា​ឧបាយកល៍​ដើម្បី​បង្កើត​បរិយាកាស​សប្ប​និមិត្ត​ឲ្យ​អាប់អ៊ួរ​​ឆ្ពោះទៅ​រក​ការបោះឆ្នោត​ ​ក្នុង​គោលដៅ​បន្លំ​ប្រជាជន​ ​បន្លំ​មតិ​ ​និង​អន្តរជាតិ​ ​ហើយនឹង​គ្មាន​នរណា​គេ​ជឿ​ទេ​»​។​​គ​.​ជ​.​ប​ ​បាន​លុបឈ្មោះ​បេក្ខជន​ជាង​ ​១​០​០​ ​នាក់​ដែល​មកពី​គណបក្ស​ភ្លើង​ទៀន​ (C​P​) ​គណបក្ស​សំបុកឃ្មុំ​សង្គមប្រជាធិបតេយ្យ​ (BS​D​P​) ​និង​គណបក្ស​ឆន្ទៈ​ខ្មែរ​ (KWP) ​ដោយ​កត់​សម្គាល់​ថា​ ​បេក្ខជន​ទាំងនោះ​មិន​ចេះ​អក្សរ​ ​និង​មិន​អាច​បំពេញ​ទម្រង់​បែបបទ​ចុះឈ្មោះ​ដោយខ្លួនឯង​បាន​។​
លោក​ ​ហង្ស​ ពុទ្ធា ​ធ្លាប់​បាន​និយាយ​នៅដើម​ស​ប្តាហ៍​មុន​ថា​៖​ ​«​សេចក្ដី​សម្រេច​ទាំងអស់​សុទ្ធតែ​មានការ​ពិភាក្សាគ្នា​ច្បាស់លាស់​ ​ដោយ​ផ្អែកលើ​អង្គ​ហេតុ​ ​និង​អង្គ​ច្បាប់​ ​ត្រឹមត្រូវ​ ​ដូច្នេះ​ការចោទប្រកាន់​ណាមួយ​នោះ​ ​គ​.​ជ​.​ប​ ​សូម​បដិ​សេ​ដ។​ ​សូមឲ្យ​សាម៉ីគណ​បក្ស​​ពិនិត្យ​ខ្លួន​ឯង​ ​ថា​តើ​គណបក្ស​មាន​បញ្ហា​អ្វីខ្លះ​ក្នុង​ការ​ចុះបញ្ជី​បេក្ខជន​។​ ​ការ​សម្រេច​របស់​គ​.​ជ​.​ប​ ​គឺ​ធ្វើឡើង​ដោយ​ត្រឹមត្រូវ​ ​និង​យុត្តិធម៌​ ​និង​គ្មាន​លំអៀង​ទៅ​​គណបក្ស​​នយោបាយ​ណាមួយ​ឡើយ​»​៕RFI,KhmerTime

លោកសុនឆ័យអនុប្រធានគណបក្សភ្លើងទៀន។រូបភាព៖គណបក្សភ្លើងទៀន