ប្រធានាធិបតីអ៊ុយក្រែនបានត្រៀមខ្លួនរួចជាស្រេចក្នុងការបន្តការចរចាជាមួយរុស្ស៊ីព្រោះនេះគឺជាផ្លូវតែមួយគត់ចេញពីជម្លោះ។ប៉ុន្តែនៅតែរៀបចំសម្រាប់ការកើនឡើងនៃអរិភាពនៅភាគខាងកើត។ប្រធានាធិបតីអ៊ុយក្រែនបាននិយាយថា”ថ្ងៃនេះអ៊ុយក្រែនគ្មានជម្រើសក្រៅពីអង្គុយនៅតុចរចាទេ។ គ្មាននរណាម្នាក់នៅក្នុងប្រទេសរុស្ស៊ីអាចបញ្ចប់ជម្លោះបានទេ។មានតែប្រធានាធិបតី Vladimir Putinប៉ុណ្ណោះដែលអាចសម្រេចថាពេលណាអរិភាពបានបញ្ចប់”ប្រធានាធិបតីអ៊ុយក្រែនលោកVolodymyr Zelenskyបានផ្តល់បទសម្ភាសន៍ដល់កាសែតអាល្លឺម៉ង់Bildនៅក្នុងសន្និសីទសារព័ត៌មានក្រោយៗមកជាមួយអធិការបតីអូទ្រីស លោក Karl Nehammer លោក Zelensky បានរំលឹកឡើងវិញថា ក្រុងគៀវនៅតែបើកចំហសម្រាប់ការចរចាហើយនឹងស្វែងរកមធ្យោបាយដើម្បីបញ្ចប់អរិភាព។ ទោះបីជាយ៉ាងណាក៏ដោយលោកបាននិយាយថាអ៊ុយក្រែនត្រូវតែត្រៀមលក្ខណៈក្នុងពេលដំណាលគ្នាសម្រាប់សមរភូមិដ៏សំខាន់និងសម្រេចបាននៅភាគខាងកើតនៃប្រទេស។ប្រធានាធិបតី​អ៊ុយក្រែន​បាន​និយាយ​ថា​៖«​យើង​ត្រៀម​ខ្លួន​ជា​ស្រេច​ដើម្បី​ប្រយុទ្ធ​និង​រក​វិធី​ដើម្បី​បញ្ចប់​អរិភាព​ការទូត»។លោកបានព្រមានថា យោធារុស្ស៊ីកំពុងបង្កើនការប្រមូលផ្តុំកម្លាំងសព្វាវុធនិងបរិក្ខារនៅលើរណសិរ្សភាគខាងកើតនិងខាងត្បូងនៃអ៊ុយក្រែនដើម្បីត្រៀមពង្រីកការគ្រប់គ្រងរបស់ខ្លួននៅក្នុងតំបន់ទាំងនេះ។យោងតាមលោក Zelensky លទ្ធផលនៃការវាយលុករបស់រុស្ស៊ីលើកក្រោយនឹងអាស្រ័យលើកត្តាមួយចំនួនរួមទាំងកម្លាំងការពាររបស់យោធាអ៊ុយក្រែនល្បឿននៃជំនួយអាវុធពីដៃគូរនិងការប្តេជ្ញាចិត្តរបស់ថ្នាក់ដឹកនាំរុស្ស៊ី។នាយករដ្ឋមន្រ្តីអង់គ្លេសលោក Boris Johnson ក៏បានធ្វើទស្សនកិច្ចដ៏គួរឱ្យភ្ញាក់ផ្អើលមួយទៅកាន់រដ្ឋធានីគៀវ នៅថ្ងៃនេះ និងបានជួបពិភាក្សាជាមួយលោកZelenskyជាកន្លែងដែលលោកបានប្រកាសថាចក្រភពអង់គ្លេសកំពុងរៀបចំជុំថ្មីនៃការគាំទ្រផ្នែកហិរញ្ញវត្ថុនិងយោធាសម្រាប់អ៊ុយក្រែន។ទីក្រុង​ឡុងដ៍​មិន​បាន​ប្រាប់​ពី​ដំណើរ​ទស្សនកិច្ច​របស់​នាយក​រដ្ឋមន្ត្រី​Johnson​ជាមុន​ទេ។ ក្នុង​អំឡុង​ពេល​សន្និសីទ​កាសែត​មួយ​ថ្ងៃ​កន្លង​ទៅលោក Johnson បាន​បញ្ចៀស​សំណួរ​ម្តង​ហើយ​ម្តង​ទៀត​អំពី​លទ្ធភាព​នៃ​ការ​ជួប​ប្រធានាធិបតី Zelensky ផ្ទាល់​នៅ​ទីក្រុង គៀវ។កាលពីសប្តាហ៍មុនអង់គ្លេសក៏បានសន្យាថានឹងផ្តល់ឱ្យកងទ័ពអ៊ុយក្រែននូវ”ឧបករណ៍យោធាកម្រិតខ្ពស់” ដែលមានតម្លៃសរុបប្រហែល១៣០លានដុល្លារអាមេរិក រួមទាំងកាំជ្រួចការពារដែនអាកាស Starstreak អាវុធប្រឆាំងរថក្រោះចំនួន៨០០ដើម និងអាវុធដែលមានភាពជាក់លាក់ខ្ពស់។មេដឹកនាំអឺរ៉ុបជាបន្តបន្ទាប់បានធ្វើទស្សនកិច្ចនៅទីក្រុងគៀវក្នុងសប្តាហ៍នេះរួមទាំងប្រធានគណៈកម្មការអឺរ៉ុប Ursula von der Leyen និងប្រធានកិច្ចការបរទេសសហភាពអឺរ៉ុប (EU) លោក Josep Borrell។ដំណើរ​ទស្សនកិច្ច​នេះ​ធ្វើ​ឡើង​បន្ទាប់​ពី​អ៊ុយក្រែន​បាន​បញ្ចេញ​រូបភាព​មួយ​ចំនួន​ដែល​ចោទ​កង​កម្លាំង​រុស្ស៊ី​ថា​បាន​សម្លាប់​ជន​ស៊ីវិល​នៅ​ក្រុង Bucha។ ទីក្រុងម៉ូស្គូបានបដិសេធរាល់ការចោទប្រកាន់ដែលថាយោធាមានចេតនាវាយប្រហារទៅលើជនស៊ីវិល ហើយបានចោទប្រកាន់កងកម្លាំងអ៊ុយក្រែនថាកំពុងរៀបចំកន្លែងកើតហេតុ។លោក Serhiy Gaidai អភិបាលខេត្ត Lugansk បានបន្តស្នើឱ្យជនស៊ីវិលជម្លៀសចេញជាបន្ទាន់នូវទីក្រុងដែលមានឈ្មោះដូចគ្នា ដោយសារតែហានិភ័យនៃការកើនឡើងនៃអរិភាពនៅក្នុងប៉ុន្មានថ្ងៃខាងមុខនេះ។មន្ត្រីអ៊ុយក្រែនបានព្រមានម្តងហើយម្តងទៀតឱ្យរុស្ស៊ីដកកងកម្លាំងរបស់ខ្លួនចេញពីភាគខាងជើងនៃប្រទេស ដើម្បីដាក់ពង្រាយឡើងវិញនូវរណសិរ្សភាគខាងកើតដោយត្រៀមបើកការវាយលុកថ្មីមួយដើម្បីគ្រប់គ្រងតំបន់ Donbass ទាំងមូល។យោងតាមអភិបាលក្រុង Gaidai បានឱ្យដឹងថា ប្រហែល៣០% នៃអ្នកស្រុកនៅក្នុងទីក្រុងនិងទីប្រជុំជនក្នុងខេត្តLuganskនៅតែប្រកាន់ខ្ជាប់ទោះបីជាមានការអំពាវនាវឱ្យជម្លៀសក៏ដោយ។លោកបានប្រាប់ទូរទស្សន៍រដ្ឋថា”យើងបានកត់សម្គាល់ឃើញថាកងទ័ពរុស្ស៊ីកំពុងប្រមូលផ្តុំកម្លាំងរបស់ពួកគេក្នុងការរៀបចំសម្រាប់ការវាយប្រហារហើយចំនួននៃការបាញ់ផ្លោងក៏បានកើនឡើងផងដែរ” ។Lugansk បានបង្កើនយុទ្ធនាការរបស់ខ្លួនដើម្បីជម្លៀសជនស៊ីវិលមួយថ្ងៃបន្ទាប់ពីស្ថានីយ៍ Kramatorsk នៅក្នុងទីក្រុងដែលមានឈ្មោះដូចគ្នានៅក្នុងតំបន់ Donetsk ត្រូវបានវាយប្រហារដោយគ្រាប់រ៉ុក្កែត ដែលបានសម្លាប់ជនស៊ីវិលយ៉ាងហោចណាស់៥២នាក់។ អភិបាលក្រុង Oleksander Honcharenko ប៉ាន់ប្រមាណថាទីក្រុងមានមនុស្សចន្លោះពី៥០,០០០ ទៅ ៦០,០០០ នាក់មិនត្រូវបានជម្លៀសចេញ។អ៊ុយក្រែន​បាន​ចោទ​រុស្ស៊ី​ថា​បាន​បំពាក់​ក្បាល​គ្រាប់​មីស៊ីល​ដែល​មាន​ក្បាល​គ្រាប់​សាហាវ​ខ្លាំង​ក្នុង​ការ​វាយឆ្មក់​ក្នុង​ស្ថានីយ៍ខណៈ​អាមេរិក​បាន​និយាយ​ថា មីស៊ីល​ផ្លោង​រយៈ​ចម្ងាយ​ខ្លី​ត្រូវ​បាន​បាញ់​ដោយ​កងកម្លាំង​រុស្ស៊ី។ ក្រសួងការពារជាតិរុស្ស៊ីបានបដិសេធថាយោធារបស់ប្រទេសនេះបានវាយឆ្មក់ចូលស្ថានីយ Kramatorsk ហើយបានចោទប្រកាន់ថាជា “ការបង្កហេតុបង្ហូរឈាម” ដោយយោធាអ៊ុយក្រែន។ក្រសួងការពារជាតិអង់គ្លេសបាននិយាយថានៅប៉ុន្មានថ្ងៃខាងមុខនេះរុស្ស៊ីនឹងផ្តោតលើគោលដៅវាយប្រហាររួមមាន Donbass, Mariupol និង Mykolaiv ដោយមានការគាំទ្រពីកាំជ្រួច Cruise ដែលបាញ់ដោយនាវាចម្បាំងរុស្ស៊ីចូលទៅក្នុងអ៊ុយក្រែន។ ទីភ្នាក់ងារនេះព្យាករណ៍ថា កងកម្លាំងអាកាសរុស្ស៊ីនឹងបង្កើនប្រតិបត្តិការរបស់ខ្លួននៅភាគខាងកើតនិងភាគខាងត្បូងនៃអ៊ុយក្រែន ដើម្បីគាំទ្រការវាយលុកនេះបើទោះបីជាវាមិនទាន់បានបង្កើតច្រករបៀងប្រកបដោយជោគជ័យលើការតភ្ជាប់រវាងឧបទ្វីប Crimean និងតំបន់ Donbass ក៏ដោយ។ឧត្តមសេនីយ៍ Igor Konashenkov អ្នកនាំពាក្យក្រសួងការពារជាតិរុស្ស៊ីបាននិយាយថា កងទ័ពរុស្ស៊ីបានវាយឆ្មក់មូលដ្ឋានទ័ពអាកាស Myrhorod ក្នុងខេត្ត Poltava ភាគកណ្តាលអ៊ុយក្រែន ដោយបានបំផ្លាញឃ្លាំងរំសេវដ៏ធំមួយ យន្តហោះចម្បាំង MiG-29 និងយន្តហោះចម្បាំង Mi-8 ។អភិបាលក្រុង Dmytro Lunin បានបញ្ជាក់ថា ការវាយប្រហារនៅទីក្រុង Myrhorod បានធ្វើឱ្យមនុស្សយ៉ាងហោចណាស់២នាក់បានរងរបួស និងបណ្តាលឱ្យ “ខូចខាតយ៉ាងសំខាន់” ប៉ុន្តែមិនបានផ្តល់ព័ត៌មានលម្អិតទេ។យោធារុស្ស៊ីកាលពីយប់មិញក៏បានបាញ់មីស៊ីលដែលមានភាពជាក់លាក់ខ្ពស់ប្រឆាំងនឹងឃ្លាំងផ្ទុកគ្រាប់រំសេវរបស់អ៊ុយក្រែនដ៏ធំមួយនៅជិតទីក្រុង Novomoskovsk ក្នុងខេត្ត Dnipro នៅកណ្តាលអ៊ុយក្រែនផងដែរ។ឧត្តមសេនីយ៍Konashenkov បានប្រកាសថា រុស្ស៊ីបានវាយប្រហារលើគោលដៅយោធាចំនួន ៨៥ បន្ថែមទៀតក្នុងប្រទេសអ៊ុយក្រែន រួមទាំងប៉ុស្តិ៍បញ្ជាការចំនួន ២ កន្លែងបាញ់គ្រាប់រ៉ុក្កែតចំនួន ៣ គ្រឿងម៉ាស៊ីនបាញ់ដោយខ្លួនឯងចំនួន៤ឃ្លាំងរំសេវមួយនិងឃ្លាំងផ្ទុកភស្តុភារចំនួន២ ។លោកបាននិយាយថាប្រទេសរុស្ស៊ីបានបំផ្លាញយន្តហោះយោធាអ៊ុយក្រែនចំនួន៦៥០គ្រឿងនៃប្រភេទផ្សេងៗគ្នា រួមទាំងយន្តហោះចម្បាំង និងឧទ្ធម្ភាគចក្រ ព្រមទាំងរថក្រោះ និងរថពាសដែកជាង២,០០០គ្រឿង ចាប់តាំងពីថ្ងៃទី២៤ខែកុម្ភៈ នៅពេលដែលប្រធានាធិបតី Vladimir Putin បានចាប់ផ្តើម “ប្រតិបត្តិការយោធាពិសេស” ។ឧត្តមស្នងការអង្គការសហប្រជាជាតិទទួលបន្ទុកជនភៀសខ្លួន (UNHCR) បាននិយាយថាមនុស្សជាង៤.៤១លាននាក់បានចាកចេញពីអ៊ុយក្រែនបន្ទាប់ពីការផ្ទុះឡើងនៃអរិភាព។ អ្នកជម្លៀសជាច្រើននាក់ពីអ៊ុយក្រែនឆ្លងកាត់ប្រទេសជិតខាងបន្ទាប់មកបន្តទៅកាន់ប្រទេសអឺរ៉ុបផ្សេងទៀត។ការិយាល័យអគ្គរដ្ឋអាជ្ញានៃប្រទេសអ៊ុយក្រែនបាននិយាយថា គិតត្រឹមថ្ងៃទី០៩ ខែមេសា កុមារសរុបចំនួន ១៧៦នាក់ត្រូវបានសម្លាប់និង៣២៤នាក់បានរងរបួសក្នុងអំឡុងពេលប្រតិបត្តិការយោធារបស់រុស្ស៊ីនៅក្នុងប្រទេស៕យោងតាម TASS, Reuters, AFP

ប្រធានាធិបតីអ៊ុយក្រែនលោកVolodymyr Zelensky។រូបភាពAFP